Ужгород в проєкті з Михалівцями і Шаторолйоуйгельом

В рамках меджінародного україньско-мадярьско-словацького проєкту планують ся засновати в сусідніх реґіонах містьскы (муніціпалны) ґалерії і професіоналны турістічно-інформачны центры европского штандарду, інформовав україньскый портал Zaholovok.

Єдна ґалерія має выникнути в Ужгороді, в історічно-културнім комплексі Совине гніздо, друга в Михалівцях. В Михалівцях із той причіны будуть реконштруовати історічну ґалерію Золотый бык (Zlatý býk).

Проєкт трьох міст

У віторок 16-го апріля 2019-го року в просторах Ужгородьской містьской рады быв підписаный договор про реалізацію сполочного ґрантового проєкту із участьов міста Михалівці на Словакії, Ужгорода і мадярьского Шаторолйоуйгелю. Тот проєкт ся буде фінанцовати в рамках Проґраму черезгранічной співпраці Мадярьско – Словакія – Румунія – Україна 2014 – 2020.

Цільом проєкту є всокочіня културной дідовизны в Михалівцях і Ужгороді, презентація того културного богатства, соєдиненя жытелів пригранічных реґіонів посередництвом културы, уменя, сполочной історії і пропаґація културной дідовизны як основы розвитку турізму.

Як інформовав протал Zaholovok, в сусідніх реґіонах мають ся засновати містьскы ґалерії і професіоналны турістічно-інформачны центры. Но в рамках проєкту планують ся і творчі варсштаты, меджінародны пленеровы сімпозіюмы мальованя і скулптуры ці наточіня документарного філму Історія і сучасность сполочного реґіону. Проєкт не забыв ани турістічных проводників, котры ся мають із ґранту друковати.

Підняти турістічный імідж

Реалізація проєкту є напланована на 25 місяців, першы практічны крокы хотять робити в осени того року.

Олександр Білак із Ужгородьской містьской рады надіять ся, же проєкт подарить ся успішно реалізовати і поможе підняти турістічный імідж міста Ужгород. Місто на Тисі має інтерес і о далшы проєкты в рамках такой співпраці.

Жрідло фотоґрафії: Zaholovok.com.ua.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА