В долині Попраду вдяка Eurovelo 11 выникли новы трасы, лавкы і інфоцентер

Будованя меджінародной біціґльовой стежкы Eurovelo 11 на теріторії Пряшівского самосправного краю (ПСК) продовжує.

Як інформовала Даша Єленьова, говоркыня ПСК, в окресі Стара Любовня вдяка успішному черезгранічному проєкту подарило ся перепоїти села долины рікы Попрад з Мушынов на польскім боці граніці. Выбудовали ся новы лавкы, місця на одпочінутя і новый інформачный центер в Сулині.

В рамках проєкту з назвов Новый турістічный продукт – часть трансевропской ціклотрасы Eurovelo 11 Пряшів – Мушына – Мнішек на Подпрадом із средств Европского фонду реґіоналного розвитку в рамках проґраму Interreg V-A Польща – Словакія проінвестовало ся 3,2 міліона евр, причім вытраты на словацькім боці досягли суму майже 1,1 міліона евр.

Ведучім партнером проєкту є Ґміна Мушына. Ґміна забезпечіла на польскім боці выбудованя і оправу біціґльовой стежкы довгой майже 8 кілометрів, так само выбудованя двох лавок на трасах Леґнава – Милик і Андриївка – Малый Липник.

В рамках проєкту выбудовала ся і ціклотраса із державной граніці од Мушыны до села Леґнава, далше ся выбудовало 2,5 кілометра трасы меджі Сулином і містнов частьов Заводя, як і драгы ку двом лавкам через попрад в Леґнаві і Малім Липнику.

Цілково подарило ся зробити 28 кілометрів значеных ціклостежок і выбудовати понад 6,5 кілометра цалком новых асфалтовых частей.

Кедьже села мають при европскых проєктах проблемы із сполуфінанцованьом проєктів, помічну руку подав і Пряшівскый край.

„Усвідомлюєме собі, як складным є про малы села з ограніченыма бюджетами забезпечіти повинне 5-процентне сполуфінанцованя европскых проєктів. Зато 27 тісяч з нашого ґрантового проґраму Вызва про реґіон про тот проєкт были добрі інвестованы грошы.

Є важным помагати собі і розвивати турістічный рух. Перепоїня красного северу Словакії з югом Польщі через ціклолавкы, котры ту выникли, є путьов як притягнути турістів, але і підпорити актівный одпочінок, містны актівности ці докінця робочі місця,“ повів председа ПСК Мілан Маєрьскый, котрый оцінив і нововыбудованый Інформачный турістічный центер недалеко жрідла Сулинка як далшу з конкретных інвестіцій того великого проєкту.

Меджінародна біціґльова маґістрала Eurovelo 11 бы мала на теріторії ПСК по докінчіню мати прблизно 150 кілометрів. Буде іти многыма селами, меджі нима і русиньскыма як Сулин, Малый Липник, Леґнава, Удол, Шамброн ці Баєрівці.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА