В ґміні Устя Ґорлицкє (д. Рускє) буде другій етап в выборах на війта

На основі першого етапу самоурядовых выборів, якы проходили в Польщы в неділю, 21. жолтня/октобра 2018 р., в поєдных єдиницях выбраны были новы ґаздове та радникы. Так на Лемковині, як і чужыні як кандидаты ріжных комітетів стартували і Лемкы. В ґміні Устя Ґорлицкє (давно Рускє), в якій прожыват днес найбільше представників лемківской етнічной меншыны на Лемковині, никотрий з кандидатів на війта не выграл в першым етапі, прото 4. листопада/новембра 2018 р. пройде другій етап выборів на тото становиско.

Кандидатів в тогорічных выборах на становиско війта ґміны Устя Ґорлицкє нашло ся трьох. Сут нима Збіґнєв Людвін, Андрий Палюх та Томаш Андрусікєвіч. Наймолодший з кандидатів, А. Палюх, якій має лемківскє походжыня, одпал в першым етапі (418 голосів – 14.06%). Зато в другым жытелі ґміны выберати будут медже двома найсильнійшыма кандидатами, т.є. Збіґнєвом Людвіном (1379 голосів – 46.37%) і Томашом Андрусікєвічом (1177 голосів – 39.58%).

17 років (од 2001 р.) війтом ґміны, в якій прожыват найбільше представників лемківской меншыны на рідній земли, был Димитрий Рыджанич, Лемко, якій выходит з сусіднього села, Квятоня. По парох успішных каденциях, долголітній війт рішыл більше не кандидувати на найважнійше становиско в Устю.

Революцию мож достеречы в новым складі Рады Ґміны Устя Ґорлицкє. З попереднього складу рады в новій каденциі засідало буде лем двох радных. Решта, т.є. дальшых 13 осіб, буде мала свій дебют як радникы (єдна з тых осіб засідала в раді в каденциі в роках 2010-2014). Серед складу новой рады найти мож і лемківскы назвиска. Дебютантом є м.ін. Мирослав Пелехач, шолтыс Ґладышова, член Руской Бурсы в Ґорлицях, ци Андрий Барна, якій жыє в Ліщынах. Єдным з двох радных, якы засідали в попередній каденциі, є Миколай Гальчак з Брунари.

Уступуючий війт, Димитрий Рыджанич, был в тогорічных выборах кандидатом на радного. Як вказали результаты выборів, не отримал він конечного чысла голосів і такой кінчыт свою соспільну і політичну діяльніст в Уряді Ґміны. В тогорічных выборах на війта підтримал Збіґнєва Людвіна.

Подля повселюдного спису з 2011 р. на обшыри ґміны Устя Ґорлицкє прожыват найбільше Лемків, якы заселяют етнічу територию Лемковины. Од 2012 р. 8 сел з обшыри ґміны має двоязычны, польско-лемківскы назвы місцевости (Бліхнарка, Ґладышів, Ждыня, Конечна, Кункова, Новиця, Реґєтів, Ріпкы). В самым Устю Рускым, як і декотрых другых селах, находят ся православны і грекокатолицкы парохіі. Недалеко од Уряду Ґміны, в центрі Устя видіти мож памятник лемківскых ветеранів ІІ світовой войны, на якым так само є інскрипция в лемківскым языку.