В Ґорлицях вознесли нештоденный памятник – Сидур Прохожых

Нештоденну будівлю в формі звізды Давида поставили при Стружовскій улици в Ґорлицях, перед брамом жыдівского цмонтеря. В єй стіны вмонтували мацевы, котры нашли під бывшом синаґоґом. Обєкт має упамятнити колишніх жыдівскых жытелів.

Сидур Прохожых – так звучыт назва памятника, має быти «місцьом памяти о нашых сусідах, знаємых, приятелях, людях, котры безповоротні зникнули з Ґорлиц. Місце зроблене зато, жебы памят нашой спільной істориі і страшенных подій ІІ світовой войны николи не загынула» – мож чытати в комунікаті ініциятора памятника, якым є Уряд Міста в Ґорлицях.

Бетонова звізда Давида

Перед ІІ світовом войном Жыды становили близко половину жытелів Ґорлиц. Мали синаґоґы, бібліотекы, стоваришыня, заклады ітп. Не зосереджали свого жытя выключні серед своіх, але были активном частю ґорлицкой соспільности, брали участ в жытю міста.

Схоснуване в назві слово сидур означат жыдівскій молитовник, в якым поміщены сут молитвы одправляны так дома, як і в синаґозі. Памятник має форму звізды Давида, до середины ведут штырі отверты входы. На бетоновых стінах і в рогах будівлі замонтували парудесят мацев, якы выдобыли в 2015 році спід підлогы неістнуючого уж будинку синаґоґы Бешт на Двожыску. Част мацев перетырвала во фраґментах. При некотрых повісили табличкы з поясніньом інскрипциі.

Сидур Прохожых запроєктувала фірма з Нового Санча – Проєктове Бюро Марек Фіялковскій, а зреализувала фірма Гажбуд. Обшыр довкола упорядкувал, зробил доізд Містецкій Заклад Комунальных Услуг.

Ґорлицкы Жыды упамятнены

Як дале подає містецкій уряд, тот нештоденный памятник был зробленый в рамках проєкту «Ґорлиці. Минуле/Будуче – жыдівска сохранена істория». Ціліст проєкту выносила близко 360 тис. зл, з чого місто здобыло дотацию высокости 105 тис. зл од Міністерства Заграничных Справ. Проєкт закладал тіж інчы формы упамятніня жыдівской соспільности Ґорлиц, м.ін. «Сліды неприсутных» (зникаючый мураль, котрый видно лем вчас дощу), пленерове кіно, онляйновы варштаты і выклады.

Фот. Уряд Міста Ґорлиці