В Гостовицях припомянули собі жертвы войны

4-ый річник турістічного походу ку дзвініці на битевнім полю 1-ой світовой войны на верьшку Скоры, котрый находить ся над селом Гостовиці, в окресі Снина, проходив у суботу 28-го юла 2018-го року. Головным орґанізатором быв Клуб воєньской історії Бескіды (КВІ Бескіды).

Поход має за ціль спопуларізовати тото місце і єдночасно людям приближыти його історію, як повів про словацькый денник Korzár Мартін Дробняк із КВІ Бескіды. 12 кілометрів довга траса веде через научну турістічну стежку, котрыу членове клубу збудовали перед роком. На стежці находять ся інформачны панелы, із котрых ся туріста дізнать веце о тім, як 1-ша світова война засягла теріторію днешньой Словакії, якы бої проходили в околіці села Гостовиці і інформації о дзвініці.

Дзвініця была збудована перед двома роками, є з дерева і має шість метрів. Іщі перед тым ся в селі подарило обновити воєньскый цінтерь. Почас Великой войны як раз коло того села проходили інтензівны бої, головно в апрілю 1915-го року, што є знаме як Великодня битва. Втогды собі тяжкы бої выжадали тісячі мертвых і далшы тісячі раненых. Остаткы мертвых вояків російской і австро-угорьской армії были із тых місць перевезены до кріпты в Осаднім.

Панахіда на цінтері і коло дзвініці

Іщі перед турістічным походом положыли ся вінці на зреконштруованім воєньскім цінтері в селі, де містный ґрекокатолицькый парох Михал Ґалмус одкінчів панахіду.  Честну страж тримали членове Озброєных сил Словацькой републікы, конкретно із одділу артілерії, котрый находить ся в Михалівцях. По панахіді ішли турісты із Словакії, Чеськой републікы, Польщі, Мадярьска і Україны ку дзвініці над селом. По положіню вінців там панахіду одслужыв воєньскый духовный Православной церькви в Чеськых країнах і на Словакії Сімон Цап і проповідь собі про участных приготовив православный парох із Осадного Петро Сорока.

За КВІ Бескіды ся на події приговорив Радослав Турік, котрый, як інформовав Петро Сорока на сайті Krypta.sk, выразив потішіня із дзвініці і повів о далшых планах клубу. В будучности бы подля Туріка хотіли збудовати памятникы, на котрых будуть назвы вшыткых словацькых полків, якы залучіли ся до боїв 1-ой світовой войны в рамках Австро-Угорьской армії. Як повів, было бы то так унікатне місце на Словакії.

Жрідло фотоґрафії: Krypta.sk.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА