На старім путницькім місці ґрекокатоликів на Земпліні, в селі Клокочів в окресі Михалівці, выникне путницькый центер. Його основный камінь посвятив в суботу 7-го марца 2020-го року апостольскый адміністратор Кошыцькой ґрекокатолицькой єпархії владыка Кіріл Василь.
Посвячіня основного каміня проходило в рамках марцовой фатімской суботы. Архієрейску літурґію, в рамках котрой быв камінь посвяченый, служыли обидвоми кошыцькы владыкове – єпарха Мілан Хаутур і адміністратор Кіріл Василь. Інформовав о тім Пресовый центер Кошыцькой єпархії. Основный камінь є близко теперішнього польного престола, на котрім ся служыть почас векшых одпустовых і іншых подій.
Центер з уквартельованьом
Проєкт путницького центру в ареалі найвызначнішого і найстародавнішого путницького місця Кошыцькой ґрекокатолицькой єпархії, має наповнити такой дві амбіції.
Реконштрукційов сучасных просторів бы мала выникнути адекватна база про приниманя путників, включно поліфункчной авлы, інформачного центру і гіґєнічных зардяджінь. Другым пунктом є вытворіня просторів на уквартельованя.
„Путницькый центер має служыти і як заряджіня на уквартельованя про тых, котры бы хотіли на берегах Земпліньской шыравы абсолвовати духовны ексерціції, припадно іншым способом підпорити розвиток реліґійного турізму під Вігорлатом,“ інформовала єпархія. Капаціта на уквартельованя бы мала быти про 40 особ.
350-та річніца Клокочівской Богородіці
Село Клокочів стало вызначным путницькым місцьом іщі в році 1670, по тім, што ікона Пресвятой Богородіці в містній ґрекокатолицькій деревяній церькви зачала почас куруцькых воєн, в котрых войовали Русины по боці Франтішка ІІ. Ракоція, слызыти, пізніше і рыдала. В Клокочові ся моментално находить їй друга копія. Де є оріґінална ікона і їй перша копія ся не знать.
В рамках 350-той рінчіці того чуда Кошыцька ґрекокатолицька єпархія выголосила рік 2020 за Юбілейный рік. В рамках нього ікона Клокочівской Богородіці буде і в Римі, папа Франціск коло ньой буде служыти омшу 29-го юна. При тій нагоді хоче папу кошыцькый єпархіалный єпіскоп владыка Мілан Хаутур пожадати, жебы людову назву іконы підняв до офіціалной подобы реґіоналной назвы „Покровителька Земпліна“.
ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА