В Кулі припомянули собі скулптора Евґена Кочіша

Як інфомровала аґентура Рутенпрес, з нагоды 101-ой річніці од народжіня і 51-ой річніці од смерти Евґена Кочіша Народна бібліотека Кула в Сербії приготовила на 25-го фебруара 2023-го року подію, жебы припомянути того несправедливо забытого русиньского умелця.

Подія на припомянутя русиньского скулптора з Войводины одбыла ся в Школі основной музичной освіты в Кулі. Подія была повязана з выставов, на котрій презентовав ся скулптор і його творы. Так само могли участны посмотири і відео о нашім умелцьови, а акторьску інтерпретацію жывота Евґена Кочіша приготовили акторы театру Културного центра Кула.

Участным на події быв і ученик Евґена Кочіша, вызначный сучасный умелець з Коцура, Сілвестер Макаї.

Скулптор і малярь Евґен Кочіш (25. 2. 1922 р. – 12. 12. 1972 р.) быв родаком з Кулы. На значну часть його пізнішого умелецького доробку мала вплив Друга світова война, коли Войводина была анектована Мадярьском.

У 1942-ім році быв арештованый за підозріня з антідержавной діятельности, і посланый быв до концентрачного лаґру, одкыль ся му подарило втечі до мадярьской армії. На фронті на Словакії у 1944-ім році дезертовав і приєднав ся до чеськых партізанів. Пізніше вернув ся домів і закінчів воєнську службу вже в югославскій армії.

По демобілізації у 1947-ім році зачав штудовати на Академії умень в Загребі і став академічным скулптором. Векшына його творів є з ґіпсу і бронзу в штілі, котрый мож назвати репрезентатівным експресіонізмом. Што до малярьского діла, Кочіш робив векшыново реалістічны портреты.

Евґен Кочіш зробив і портреты дакілько войводиньскых русиньскых діятелів. З десятьох його персоналных выстав першы дві одбыли ся в Руськім Керестурі, де так само зробив памятник партізана Другой світовой войны. Вмер в Сомборі.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА