В Лютині припомянули собі 35 років од установліня базилікы мінор

Почас вікенду 19-го і 20-го авґуста 2023-го року на найвекшім путницькім місці ґрекокатоликів на Словакії – в Лютині, одбыв ся архієпархіалный одпуст з нагоды праздника Успенія Пресвятой Богородіці.

Як інформовав Михал Павлишиновіч, говорця Пряшівской ґрекокатолицькой архієпархії, духовенство і віруючі собі на тогорічнім одпусті припомянули і 35-ту річніцю установліня містного храму на базиліку мінор.

Одпуст за участи трьох єпіскопів

Богатый духовный проґрам одпусту быв приготовленый як традічно на двох місцях – в базиліці мінор долов у селі, а так само на Маріяньскій горі над селом, де перед 172-ма роками зъявив ся святый Николай бідній вдові Зузані Фекете.

Головным пунктом проґраму успеньского одпусту в Лютині была недільна торжественна архієрейска літурґія, яку одслужыв владыка Петро Руснак, апостольскый адміністратор Пряшівской архієпархії і братіславскый єпарха. Вєдно з ним служыли емерітный пряшівскый архієпіскоп і митрополіта Йоан Бабяк, братіславкый помічный єпіскоп Мілан Лах, десяткы священиків і діаконы із вшыткых єпархій на Словакії.

Проповідь на торжественній літурґії тримав архімандріта Ярослав Лайчіак, протосінкел Кошыцькой єпархії.

Співом торжество в Лютині допроводили Храмовый хор блаженого священомученика Павла Петра Ґойдіча з Воронова над Топльов, молодежный Хор святых Петра і Павла з Мільпоша, і співачка Моніка Кандрачова.

Базиліка мінор

В маріяньскім році, 22-го юна 1988-го року, Вселеньскый Архієрей Йоан Павел ІІ. апостольскым бреве установив лютиньску Церьков Успенія Пресвятой Богородіці на базиліку мінор.

Лютина стала центром ґрекокатолицькых путників по тім, што ся в авґусті 1851-го року зъявив на недалекій горі над селом святый Николай бідній вдові Зузані Фекете і пожадав єй, жебы там была збудована каплічка присвячена Успенію. Од 1855-го року зачали на місці зъявліня робити ся реґуларны путованя віруючіх.

З будованьом днешньой базилікы мінор почало ся у 1896-ім році і храм докінченый быв у році 1903. Курто передтым пожар зничів попередній деревяный Храм святых Козмы і Даміяна. Днесь є базиліка мінор домінантным храмом, і од 2010-го року є звязана з базиліков Santa Maria Maggiore в Римі.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА