В Мадярьску будуть святковати День памяти Годинкы

11-го фебруара 2017 р. в Мадярьску, в головнім місті Будапешть, Русины будуть праздновати День памяти Антонія Годинкы. Подію шторік орґанізує Вседржавноє Русинськоє Самосправованя.

Проґрам святкованя зачінать о 12.00 год. панахідов коло гроба вызначного русиньского академіка, котрый походив із теріторії днешньой Словакії – зо села Ладомирів. По панахіді буде проґрам продовжовати в Културнім домі в районі Зуґло ( Zugló Civil Ház) в Будапешту.

Як каждый рік, і теперь в рамках святкованя торжественно буде вручати ся Премія Антонія Годинкы. На святочнім проґрамі буде выступати і дуо Червена Ружа із Підкарпатя, котре творять Ольга Прокоп і Лілія Немеш. Як раз Ольга Прокоп має быти єдным із тогорічных лавреатів той споминаной нагороды. Премію бы того року мала дістати і редакція ґазеты Народны Новинкы.

Народны новинкы были першов ґазетов Русинів в Чехословакії, пізніше на Словакії. Выходили од 21-го авґуста 1991-го року до децембра 2016-го року. Од року 2017 ґазета злучіла ся із ґазетов Інфо Русин, котра мала за собов 13 років выдаваня. Русины на Словакії тым чіном од року 2017 мають єдны злучены новинкы, котры выходжають під назвов НН інфо Русин – Народны новинкы Русинів Словакії. Цілых 25 років выдаваня Народных новинок быв шефредактором ґазеты Александер Зозуляк. Тот од того року зістав уж лем шефредактором часопису Русин, котрого перше чісло вышло іщі в році 1990.

Антоній Годинка быв вызначный славіста, історік, академік Мадярьской академії наук, ректор Печской універзіты і честный председа Підкарпатьского общества наук. Народив ся 7-го фебруара 1864 року в селі Ладомирів на Пряшівскій Руси. Умер 15-го юла 1946 року в Будапешті.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА