В Маріяповчі одбыв ся русиньскый одпуст

В неділю 2-го авґуста 2026-го року одбыв ся в мадярьскім місті Маріяповч Богородічный одпуст про русиньскых ґрекокатолицькых віруючіх, котрый зорґанізовав Світовый конґрес Русинів під веджіньом председы Штефана Лявинця із Будапешту.

На орґанізованю того одпусту співпрацовало і Русиньске націоналне самосправованя в Маріяповчі, котре під веджіньом Арпада Фаркаша діє од 2024-го року. Орґанізаторы одпусту приготовили проґрам про путуючіх уж в суботу, кедь окрем Службы Божой і презентації базилікы быв приготовленый концерт духовных піснь і свічкова процесія коло базилікы.

Головнов частьов одпусту была недільна торжественна Служба Божа, котру на церьковнославяньскім языку за участи дакілько сто віруючіх одправляв отець Мілан Ясик – председа Общества святого Йоана Крестителя із Словакії. Вєдно з ним окрем двох домашніх священиків служыли і отець Василь Бойчук із Румунії а отець Володимір Седлак із села Петровці в Хорватії.

Пряшівскый архієпіском митрополіта Йона Максим сам повірив отця Ясика, жебы одслужыв літурґію в рамках русиньского одпусту, кедьже він сам быв в тот день на архієпархіалнім одпусті на Буковій Гірці.

Участь на русиньскім одпусті брали Русины із Мадярьска, Румунії, Підкарпатя, Хорватії і Словакії.

Припомяньме, же основнов ідейов орґанізаторів того одпусту была стріча русиньскых віруючіх на тім вызначнім паломницькім місці, де в містній базиліці – Храмі святого Михаіла Архістратига, находить ся чудотворна ікона Пречістой Дівы Марії.

На основі інформацій од орґанізаторів послідній одпуст в такім дусі одбыв ся в Маріяповчі перед 106 роками. Світовый конґрес Русинів хоче в тій традіції продовжати і в слідуючіх роках.

Автор: о. Мілан Ясик