В Мукачові припомянули собі 30 років од обновліня Общества Духновіча

В суботу 20-го апріля 2024-го року в просторах Мукачовской містьской централной бібліотекы імени Александра Духновіча одбыла ся святочна подія, котров припомянула собі русиньска громада Підкарпатя 30 років од обновліня Общества імени Александра Духновіча.

На події выступили Юрій Продан – голова Закарпатьского областного научно-културолоґічного общества імени Александра Духновіча, Юрій Шипович – голова Русиньского културолоґічного клубу, Євген Жупан – голова Народной рады Русинів Закарпатя і далшы.

Участници так само положыли вінець ку басрельєфу Духновіча, котрый находить ся на фасаді бібліотекы, яка несе його імя.

Русское культурно-просвѢтительное общество имени Александра Духновича было основане 23-го марца 1923-го року в Мукачові на зборах 163-ох културных актівістів Підкарпатьской Руси, і было якбач найвызначнішов русиньсков културно-общественнов і освітньов орґанізаційов Русинів того періоду нелем на Підкарпатьскій, але і на Пряшівскій Руси.

Дефінітівно свою роботу закінчіло у 1944-ім році приходом Червеной армії на Підкарпатя, хоць фунґованя общества властно перервало ся з політічных причін уж на кінцю 1938-го року.

24-го апріля 1991-го року была в селі Поляна, Свалявского району, одкрыта буста Духновіча, в рамках чого выступав і Михаіл Алмашій, котрый оголосив потребу обновліня общества. Через два рокы, 24-го апріля 1993-го року, в Ужгороді одбыли ся установлюючі зборы Ужгородьского містьского общества імени Александра Духновіча. За першу голову быв выбраный Василь Русин.

19-го авґуста 1993-го року одбыло ся в Мукачові засіданя ініціатівной ґрупы в справі возроджіня общества, де вырішыли зробити 18-го септембра того самого року в Домі Русинів установлюючі зборы Містьско-районного общества імени Александра Духновіча. На установлюючіх зборах быв за голову выбратый Михаіл Алмашій.

12-го апріля 1994-го року, од чого минуло точно 30 років, зорґанізовала ся установлююча конференція Областного общества імени Александра Духновіча, котрого головов став так само Михаіл Алмашій. Днешнє Закарпатьске областне научно-културолоґічне общество імени Александра Духновіча є так прямым наслідником меджівойнового общества.

Припоминаме, же паралелно з тым было обновлене Общество Духновіча і в Пряшові. На тім мав заслугу далшый вызначный русиньскый актівіста по 1989-ім році, Гавриїл Бескид. Робота общества в Пряшові почала стаґновати вєдно з тым, як зачав мати здравотны проблемы Гавриїл Бескид, котрый у 2022-ім році вмер.

Фото: Мукачовска містьска централна бібліотека імени Александра Духновіча.