Голосник

В натурі вшытко по старому

В моменті коли чловек ограничыл свою діяльніст, в природі вшытко спокійні іде своім одвічным порядком. З зимуваня вернула уж більшіст журавлів – в полудньово-східній Польщы явили ся ключы тых птахів. До своіх гнізд, м.ін. в Низкым Бескіді, дотерли уж вертаючы з Африкы боцаны.

Перед двома тыжнями в полудньово-східній Польщы зачали ся прильоты журавлів. Птахы вертали з зимовиск в пілнічній Африці в ґрупах аж і до 300 єдиниц.

Першы боцаны на Лемковині

А в минулым тыжни на Лемковині появили ся першы білы боцаны. Єдного в гнізді мож было видіти в Контах коло Нового Змигорода, а летячого виділи в Вышоватці. Обсервациями поділил ся орнітолоґ др Мариян Стуй. Природник звернул увагу, што першы боцаны на полудне Польщы найскорше прилітуют 19. марця. Того рока першы прилетіли ден скорше, а найвеце прилетит 25-26 марця. На 1. квітня/апріля більшіст гнізд буде уж занята.

Боцаны, котры вчас зимуваня в Африці жыют в стадах, вертати до Европы зачали в першій половині лютого/фебруара. Іх дорога тырват коло шестьох тыжнів. Журавлі зимуют або на полудни Европы, або в пілнічній Африці.

Боцаны а коронавірус

Більше як 11,5 тис. плятформ під боцані гнізда на енерґетичных стопах замонтувала в суботу 21. марця Ґрупа Енерґа. Вшыткы в пілнічній части Польщы. Боцаны люблят выберати стопы під своі гнізда, бо драпіжникам є о вельо тяжше добрати ся до яєц і молодых птахів як в примірі гнізд, што ся находят на деревах ци стодолах.

Гнізда на стопах то єднак загороза не лем для птахів, але і оточыня – в сусідстві енерґетичных леній може дойти до поражыня птахів, а голузкы і інчы річы хоснуваны до будовы гнізна можут спричынити зменшыня електричного опору в обводі і пошкоджыня енерґетичных леній, а в наслідстві перервы в доставах енерґіі.

Ґрупа Енерґа урухомила специяльну інфоленію 801 BOCIAN (801 26 24 26), жебы зголошувати приміры тыкаючы загорозы енерґетичных леній з огляду на птахы. Як подала компанія, того рока найчастійше люде дзвонят, жебы звідати ся о коронавіруса. Спілпрацуючый з ҐЕ біолоґ Кжыштоф Конєчный ґарантує, што неє доказів, жебы боцаны го переносили. Так само не потверджено, жебы переносили віруса вороблі, псы ци коты. Додал, што «неє потребы, жебы по сотках років спільного перебываня раптом образити ся на боцаны».

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Штоденньо од 11.00 год. веде lifestyle'овый проґрам «Пачісна година» , а в суботы о 9.00 год. чытат для Вас порталь. Контакт: natalia@lem.fm

Коментарі