В неділю дорічне Свято хліба в Хмельовій

В Хмельовій, што находит ся близко граничного переходу Бехерів-Конечна, в найблизшу неділю, 23. вересня/септембра, проходил буде 19. річник Фольклорных Свят – Дни русиньскых традиций або як Хмелівчане кличут – Свято хліба.

Свято зачне ся перед полудньом Служвом Божом в місцевій грекокатолицкій церкви Успіня Пресвятой Богородиці. Пополудни фестіваль буде продолжал ся в просторах сельского Культурного дому. Ту буде про участників приготовлена выстава старого ремесельного нарядя і керамічного кумшту, узше-шырше повязаного з выробом хліба. Потім ся одбуде традицийний акт посвячыня хліба – благословліня хлібів, колачів, вина. Пак же буде мож іх коштувати.

В Хмельовій в тот ден пройде і культурний проґрам. Ден прикрашати будут выдатны солисткы русиньской співанкы – Марка Мачошкова і Мариянна Железна, яка походит з гевсого села. Придут і фольклорны колективы Барвінок та дітяча Маковичка. Не бракне і діти з домашньой основной школы. Люди бавил буде народний розповідач Йожко Йожка. Наконец, забаву заграт капеля Замішковці.

Орґанізаторами свята є село Хмельова, Вышньошаришскій Освітний Центр в Бардийові, Русиньска Оброда на Словациі та грекокатолицка парохія в Хмельовій. Подію підпорили з фонду Уряду влады Словацкой Республикы – проґрам Культура нацийональных меншын.