В Ніредьгазі конференція присвячена Русинам

3-го фебруара 2018-го року одбуде ся в мадярьскім місті Ніредьгаза наукова конференція під назвов Довєдна на пути – Мадярі і Русины. Конференція буде проходити в просторах ніредьгазького Ґрекокатолицького теолоґічного інштітуту св. Атаназія і орґанізаторами суть Асоціація Харта ХХІ і Вседержавноє русинськоє самосправованя в Мадярьску. Інформовав о тім портал Felvidek.ma.

Лекції дослідників і науковців, котры будуть одпрезентованы на конференції, будуть поясньовати темы як роль ґрекокатолицізма в русиньско-мадярьскых односинах, русинство од Тріанона по днесь, традіція русиньской културной дідовизны, формованя народной ідентічности і далшы вопросы.

Покровительство над конференційов перевзяв архієпіскоп і метрополіта Ґрекокатолицькой церькви в Мадярьску Высокопреосвященый владыка Філіп (Кочіш). Зачаток події є напланованый на 10.00 год.