В Нижній Полянці одкрыли Пантеон особностей Першой світовой войны

Пантеон особностей Першой світовой войны святочно одкрыли в пятніцю 27-го септембра 2024-го року в Нижній Полянці, Бардейовского окресу. Інформовала о тім аґентура TASR.

Як про аґентуру повів староста села Ян Цундра, в рамках пантеону є наіншталованых 12 таблічок присвяченых найвызначнішым особам, котрый брали участь на боях коло Нижньой Полянкы і в шыршій околіці. Поступно бы мали прибывати далшы таблы з іменами.

Іде о бетонову ставбу высоку 2,7 метра, котра є довга довєдна 35 метрів. „Має дві стрілні, што має припоминати войновый окоп з даного періоду. Кедь ся поставиме до пантеону, єдиный выгляд є на верьх Каштелик, де реално проходили бої,“ повів староста.

На таблах суть мена ґенералів, але і писателів, новинарів ці архітектів. Єдна є присвячена незнамому воякови. Таблы суть шпеціално зроблены так, жебы припоминали арджу, што має евоковати хоснованя новых технолоґій почас Великой войны і початок новой еры.

Збудованя пантеону было єднов із актівностей в рамках черезгранічного проєкту фінанцованого із штруктуралных фондів. Выникнув у співпраці з Клубом воєньской історії Бескіды.

Простор, котрый быв одкрытый, має служыти нелем як памятник героїв Першой світовой войны, „але і як сімбол подякы і почливости односно тых, котры пожертвовали свої жывоты за ліпшый світ,“ написало на соціалній сіті Міністерство інвестіцій, реґіоналного розвитку і інформатізації Словацькой републікы.

„Я гордый на то, же наше міністерство могло вдяка проґраму черезгранічной співпраці Interreg з Польщов, з котров маєме в тім сполочну історію, помочі выбудовати тот памятник, а так само обновити далшы войновы цінтері з періоду Першой світовой войны,“ сконштатовав шеф резорту Ріхард Раші, котрый брав на святочнім одкрытю участь.