Голосник

В Празі згоріла русиньска деревяна церьков з Великых Лучок

В пражскій Загороді Кіньскых, часть Петржін, в середу 28-го октобра 2020-го року пополідне выникнув пожар деревяной Церькви святого Михаіла Архістратига. Огень засягнув спідню часть храму і турню. Інформовали о тім чеськы медії.

Дым было видіти і в далшых частях головного міста Чеськой републікы.  Подля публікованых фотоґрафій упала найвысша часть головной турні. При пожарі не быв нихто зраненый. Шкода натеперь не є вырахована.

„Пожаром была спідня часть храму засягнута в повнім розсягу,“ інформовав говорця пражскых гасічів Мартін Кавка на конті Hasiči Praha на соціалній сіті Twitter. О причіні выникнутя пожару затля не суть жадны інформації. Храм згорів якраз на 102-гу річніцю выникнутя Чехословацькой републікы, до котрой належала і теріторія Підкарпатьской Руси, одкыль храм походив.

Церьков святого Михаіла Архістратига

Церьков святого Михаіла Архістратига быв памятково хороненый обєкт із 17-го столітя. Храм із села Великы Лучкы на Підкарпатьскій Руси перенесли до Прагы в році 1929, почас 1-ой Чехословацькой републікы, жебы став частьов збірок Народописного музея. Будова зо шындльовов стріхов мала три турні.

Храм быв збудованый в бойківскім штілі з елементами народного барока. Найвысша вежа мала понад 17 метрів. В інтерьєрі были хосновавы тіпічны фарбы – біла, зелена і червена.

Церьков была комплетно розобрана, перенесена і пак знова поставлена до первістной подобы двараз. В році 1793 єй жытелі Великых Лучок продали векшому і богатшому селу – Медведівцям. Ку другому перенесіню дішло в році 1929, як вже было спомянуто. Святочне переданя храму жытелям Прагы одбыло ся 10-го септембра 1929-го року. На церемонії быв і ґубернатор Підкарпатьской Руси Антоній Бескид а жытелі Медведівців.

Зачатком 2008-го року здобыла деревяну церьков до хоснованя Православна церьков в чеськых землях і на Словакії, респектівно Румуньска православна церьков. Кажду неділю і понедільок там служыли ся богослужіня.

Жрідло фотоґрафій: Hasiči Praha.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі