В Пряшові одбыла ся бісіда о Духновічови

В понедільок 27-го марца 2023-го року Мала сцена Театру Александра Духновіча в Пряшові привітала участників першой публічной бісіды, серію котрых вырішыв орґанізовати Округлый стіл Русинів Словакії вєдно з радіом русин ФМ.

Темов бісіды быв найвекшый русиньскый будитель, по котрім має назву і наш русиньскый театер, і котрого 220 років од народжіня припомянеме собі в апрілю того року.

Модератор події, єдночано педаґоґ і редактор русин ФМ Ладислав Ясик привітав двох діскутуючіх. На тему під назвов Жывот Александра Духновіча діскутовали Доц. Валерій Падяк, к. н., робітник Інштітуту русиньского языка і културы Пряшівской універзіты в Пряшові, і ґрекокатолицькый священик Мілан Ясик, член Общества святого Йоана Крестителя.

Декламаційов стихів Духновіча подію збогатив член драматічного колектіву нашого театру Володимір Рогач.

Бісіда была поділена на штири тематічны блокы. Участны могли веце дізнати ся о жывоті будителя, о Духновічови як священикови, писательови ці народнім будительови. В бісіді ясно вказало ся на факт, якый величезный вплив мав Духновіч на то, же Русины знайшли ся меджі самобытныма, еманціпованыма народами.

Діскутуючі дотулили ся і темы, што є властно заповідьов Духновіча, і як є про русиньскый народ тота заповідь актуална доднесь.

Бісіда на тему Жывот Александра Духновіча была першов із серії, котру вырішыв орґанізовати Округлый стіл Русинів Словакії, тот раз під покровительством свойой історічной комісії. З бісіды робив ся авдіо і відео запис, зато по технічнім обробліню буде мож єй выслухати в ефірі радія русин ФМ, але так само буде доступна в службі Youtube, на каналі Округлого стола Русинів Словакії.

Русиньска платформа вырішыла робити такый формат, жебы позітівнов медіалнов кампаньов пошырьовати правдивы інфромації о Русинах, їх історії, як посеред Русинів, так і меджі майорітным жытельством, ці меджі іншыма народностями, кедьже цілодержавны медії часто не інформують о Русинах правилно.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА