В Пряшові одбыв ся архієпархіалный одпуст на праздник священомученика Павла Петра Ґойдіча

В Катедралнім соборі святого Йоана Крестителя в Пряшові одбыв ся в понедільок 17-го юла 2023-го року архієпархіалный одпуст з нагоды праздника блаженого священомученика Павла Петра Ґойдіча.

Як інформовав Михал Павлишіновіч з Інформачного центра Пряшівской архієпархії, в тім році одпуст быв у дусі річніці, бо минуло 135 років од народжіня блаженого Павла Петра, котрый народив ся у 1888-ім році в Руськых Пеклянах, де быв втогды його отець священиком на парохії.

Владыка установив нового архімандріту

Головным служытельом архієрейской літурґії в церьковнославяньскім языку быв владыка Мілан Лах, помічный єпіскоп Братіславской єпархії, з ним служыв владыка Петро Руснак, апостольскый адміністратор Пряшівской архієпархії а єдночасно братіславскый єпарха, і владыка Мілан Хаутур, емерітный кошыцькый єпарха. Участь брало понад 60 священиків і трьоми діаконы.

Проповідь мав протоіґумен василіянів на Словакії отець Юрій Седлачек, ЧСВВ, котрый приближыв жытя священомученика Павла Петра Ґойдіча. Окремо заміряв ся на період його священьской формації і період новіціату, котрый пережывав блаженый в монастырю на Чернечій Горі коло Мукачова.

На кінцю торжество продовжовало молебеном над мощами священомученика в бочній каплічці катедралного собору.

В рамках Божеской літурґії быв установленый новый архімандріта в Пряшівскій архієпархії, котрым став отець Марко Дурлак. Тото менованя му уділив владыка Петро Руснак за його довгорічны священьскы намагы і заслугы в службі Ґрекокатолицькій церькви на Словакії і в загранічу, но і як прояв вдякы за його вірность.

Новый архімандріта

Отець архімандріта Марко Дурлак народив ся у 1975-ім році в Левочі, рукоположеный на священика быв у 1999-ім році владыком Йоаном Гірком в Пряшові.

Послідні рокы робить на Дікастерії про восточны церькви в Римі (передтым Конґреґація про восточны церькви). Служыв шпірітуалом в Боголовсвкій семінарії блаженого єпіскопа Павла Петра Ґойдіча в Пряшові, духовным в монастырю контемплатівных сестер редемпторісток восточного обряду у Воронові над Топльов-Ломніці, церемоніарьом на Архієпіскопскім уряді в Пряшові, а в початках свойой духовной службы быв і на місії на Україні.

Почас навщівы Святішого Отця Франціска на Словакії у 2021-ім році старав ся о головны літурґічны приправы і комунікацію з папскыма церемоніарями перед і почас служіня історічно першой літурґії, котру на Словакії служыв Вселеньскый Архієрей.

Отець архімандріта має абсолвованы ліценціатны штудії патрістікы на Папскім патрістічнім інштітуті в Римі, наслідно абсолвовав докторьскы теолоґічны штудії на Папскім восточнім інштітуті. Є автором веце фаховых статей публікованых на Словакії і в загранічу.

Фотоґрафії: Михал Палочко.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА