В рамках конкурзу Книга рока ПСК оцінена і русиньска література

Літературно-чітательскый конкурз Книга рока Пряшіского самосправного краю (ПСК) успішно завершыв свій девятый річник. Як інформовала Даша Єленьова, говоркыня ПСК, в Крайскій бібліотеці Павла Орсаґа Гвієздослава в Пряшові собі в понедільок 21-го септембра 2026-го року авторы оціненых публікацій выданых в попереднім році перевзяли свої оцініня.

Книга рока ПСК шторік підтримує локалных авторів, выдавателів і ілустраторів, котры суть скапчаны із реґіоном, і помагають розвитку його културной дідовизны.

О лавреатах конкурзу вырішовала фахова журі, но своє слово мали і чітателі посередництвом онлайн голосованя. Оцінены книгы в актуалнім девятім річник вышли із 80-ох приголошеных публікацій. До конкурзу їх номіновали редакторы, выдавателі, авторы, книгарі, бібліотекы але і чітательска громада.

Оцініня были традічно уділены в катеґоріях Белетрія про діти і молодеж; Белетрія про дорослых; Научна література; Популарно-научна література, і в катеґорії Україньска і русиньска література, в котрій оцініня уділює ся раз за два рокы, і мож до ньой приголосити выданы книгы за попередні два рокы.

Тот рік до катеґорії із україньсков і русиньсков літературов было приголошеных 10 публікацій, якы были выданы в роках 2024 і 2025. Наконець в ній были выголошены дві першы і єдно третє місце.

На першім місці скінчіла публікація Співанкы нашой мамкы, од Каткы Романяковой і Марты Жаговой, а так само і по україньскы написана книга Кам’яний потік, котрой автором є Юліус Панько. На третім місці скінчіла русиньска авторка Людмила Шандалова із свойов ілустрованов книгов про найменшых чітателів під назвов Маковы приповідкы.

О уділіню Ціны публікы в каждій катеґорії вырішовали жытелі ПСК посередництвом онлайн голосованя, котре проходило од 1-го юна до 31-го авґуста. Довєдна было заевідованых 1412 голосів. В онлайн голосованю в рамках україньской і русиньской літературы выграла книжка Людмилы Шандаловой, яка здобыла 242 голосів.

Традічный конкурз Книга рока ПСК выголошує Пряшівскый самосправный край у співпраці із своїма реґіоналныма бібліотеками в Бардейові, Гуменнім, Левочі, Попраді, Пряшові, Старій Любовні, Свіднику і Воронові над Топльов. Вшыткы номінованы публікації із актуалного річника буде мож посмотрити собі на путовній выставі, котра поступно завітать до вшыткых реґіоналных бібліотек.

Фото: ПСК.