В Рудній згынул Матій Пакош (1993-2016). Вічна Йому Памят!

В результаті підземного землетрясіня в копальни міди в Рудній, котре прошло в минулий віторок вечером (29.11.2016 по 21.00 год.), згынул Матій Пакош (1993-2016), музык, член оркєстр і другых ансамблів. Од парох років был гудаком Лемківского Ансамблю Пісні і Танця «Ластівочка», котрий діє при пшемківскым кружку Стоваришыня Лемків. Грал там на клярнеті. Його выступы враз з Ластівочком могли сме не раз чути і в радию ЛЕМ.фм. Послідній раз – вчас ювілею 15-літя ансамблю, емітуваного нажыво в нашым радию, котрий проходил в жолтни/октобрі т.р. в Хойнові.

Матій Пакош в моменті зваліня ся скального бльоку находил ся враз другыма робітниками під земльом, в коморі, котра повинна охоронити перед наслідствами підземных крампів тых, што остали долов. На жаль, на тот раз не охоронила. Робил в копальни лем нецілий місяц…

Лучыме ся в болю з родином і близкыма Матія. Вічна Йому Памят!

фото: Фейсбук