В русиньскых селах Сниньского окресу потвердили жрідла воды до питя

Актівности Пряшівского самосправного краю (ПСК) в Сниньскім окресі за послідні три рокы заміряли ся на гідроґеолоґічны баданя, котры мали найти добры і богаты жрідла підземных вод, котры бы служыли на додаваня воды до питя.

Як інформовала Леа Леготьска із Одділіня комунікації ПСК, край выконав од 2021-го року понад 30 верчінь, котрых резултаты творять фундамент про зробліня проєктовой документації.

Села коло Старины дотеперь без воды

„Із 24-ох сел окресу Снина, котры суть частьов проєкту, было потверджене жрідло воды до питя в 19-ох, што поважуєме в данім гідроґеолоґічнім оточіню выходной Словакії за величезный успіх,“ повів Мілан Маєрьскый, председа ПСК.

Як далше інформовав пряшівскый жупан, і кедь тота аґенда не є в компетенції ПСК, і є вынятково складнов, є радый, же такым ділом знать крайска самосправа помочі понад 5000 жытелям теріторії, котры хоць жыють близко водного резервоару Старина, но дотеперь не мають воду до питя.

Жрідло воды до питя было потверджене в селах Березовець, Дуброва, Кална Розтока, Кленова, Ковбасов, Колоніця, Осадне, Паризівці, Пчолине, Прислоп, Тополя, Кривый, Збой, Гостовіці, Чукалівці, Рунина і Новоселіця.

Далшы дві верчіня зробив край іщі початком того року, і то в селах Шмыґовець і Руська Волова.

„При далшых селах, котры іщі не мають провірене і потверджене жрідло воды до питя, респектівно гідроґеолоґічны баданя не были успішны, задумуєме додаваня воды до питя водов із жрідел локалізованых в катастрі тых сел або з іншых алтернатівных жрідел,“ повів ведучій Одділіня проєктового ряджіня Уряду ПСК Ян Коцак з тым, же в слідучіх тыжднях зачнуть ся реалізовати ґеолоґічны баданя на жрідлах, котры будуть тырвати єден рік.

Рішыть ся уж Збойска долина

ПСК актуално забезпечує выпрацованя проєктовой документації про Збойску долину, до котрой належать села Новоселіця, Збой і Кривый.

По доданю проєктовой документації, котру бы мали мати до кінця юна того року, можуть подати о выданя позволіня. Селам пак поможе Аґентура реґіоналного розвитку ПСК при публічнім обстараваню на будованя водоводу і каналізації, і при жадости о дотацію на тот проєкт.

„Треба повісти, же села в Збойскій долині вже мають забезпечены фінанції в рамках Інтеґрованой теріторіалной стратеґії ПСК, і то в сумі 11 міліонів евр,“ повів Маєрьскый. Актуално проходять переговоры в повязаню з можливостьов фінанцованя проєкту про остатні села.

Край занимать ся забезпечіньом каналізації в 28 селах окресу Снина, в котрых жыє майже 7000 людей. Забепечіня водоводу і каналізації про Сниньскый окрес почало як проєкт в рамках ініціатівы Catching-up Regions у співпраці із Світовой банков, Европсков комісійов і Міністерством інвестіцій, реґіоналного розвитку і інформатізації СР. Проєкт бы мав быти докінченый до 2029-го року.