Чірчаньску хыжу, котра в селі Чірч в окресі Стара Любовня выникла по реконштрукції сторічного деревяного дому, в понедільок 21-го децембра 2020-го року посвятили. Село о тім інформовало посередництвом пресовой справы.
З ідейов, жебы зреконштруовати деревяну хыжу, пришли жытелі, котры єй хотіли всокотити. На обнову будинку село здобыло 70 000 евр із Европского фонду реґіоналного розвитку в рамках мікропроєкту Мушына – Чірч, сохраньме перед забытьом културу нашых предків.
Чірч робив вшыткы роботы на реконштруцкії в згоді із приписами Памяткового уряду, кедьже іде о історічну будову.
Як село інформовало, з реконштрукційов зачали на ярь того року і вшыткы роботы были выконаны сельсков фірмов Солиско Чірч. Чірчаньска хыжа буде навщівникам сприступнена зачатком слідуючого року. Довтогды ся іщі дороблять попискы ку окремым збірковым предметам, кедьже в деревяній хыжці село зробило музейну експозіцію.
Чірчаны давали свої памяткы
„Селяне з охотов даровали своє історічне богатство – памяткы на своїх предків про сохраніня русиньской дідовизны, за што їм належыть велика подяка,“ повів староста села Михак Дідік.
У єдній із трьох містностей Чірчаньской хыжы презентують ремесла, котры были про село тіпічны, як наприклад робота з леном. Окрім того до хыжы поступно прибывали крої, леновы обрусы ці добовы меблі.
„Кінцьом осени, кедь была реконштруцкія готова, сьме дарованы збірковы предметы вєдно із робітниками сельского уряду перевезли до памятной ізбы і зачали їх іншталовати,“ повіла зберателька кроїв Анна Ґернатова.
Цінны коросна і інтересности
Цінным експонатом суть стары коросна із 1940-го року, котры зробив містный теслярь Ян Ґайдош – Американ. Тоты подаровала його невіста, днесь вже 80-річна жытелька села.
В передній містности суть одпрезентованы автентічны свадбляны крої з Чірча, як і способ жывота ґаздівской родины. Інтереснов є і мальована лада, котру дістала кажда невіста од родины як придане (ку выбаві).
В середній містности є кухня і робоча часть, далшы збірковы артефакты суть в господарьскій будові коло деревяной хыжы. Фотоґрафії найдете під статьов.
Фотоґрафії: Село Чірч.
ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА