В Сербії собі меншыны новых членів націоналных совітів выберуть в новембрі

Сербскый міністер про людьскы права, меншыновы права і соціалный діалоґ Демо Беріша в пятніцю 18-го септембра 2026-го року підписав рішіня о выписаню выборів про нове скликаня націоналных совітів народностных меншын. Інформує о тім аґентура Рутепрес.

Народностны выборы одбудуть ся 8-го новембра. Выборы будуть в ряднім терміні, кедьже попередні проходили в новембрі 2022-го року, і функчный період націоналных совітів, котры суть формов меншыновой самосправы в Сербії, є чотыри рокы.

Міністерство так само інформовало, же перед тым дочасно заперло спискы воличів 23-ох народностных меншын, жебы встановити, котры сповнюють крітерії на прямы выборы націоналных совітів, і котры собі совіты выберуть посередництвом выборчіх зборів.

На основі заключіня собі 21 народностных меншын – Русины, Албанці, Ашкалійці, Боснякы, Булгары, Бунєвці, Італійці, Ґрекы, Еґіптяны, Мадяры, Македонці, Німці, Полякы, Ромове, Румуны, Словаци, Словены, Українці, Хорваты, Чорногорці і Чехы, будуть выберати членів своїх націоналных совітів прямыма выборами.

Ґораньска і російска народностна меншына будуть новы націоналны совіты выберати посередництвом выборчіх зборів.

Русины в Сербії мають свій націоналный совіт од 2002-го року, тот першый діяв лем два рокы. Моментално мають Русины 19 членів совіту. Чісло членів окремых совітів залежыть од чісла людей, котры голосять ся ку даній народностній меншыні.