В Снині будуть выставльовати кірілічны памяткы

„Хліб душі“ – таку має назву выставка, котру приготовлює Містьскый културный і освітній центер в Снині вєдно із Обществом сел мікрореґіону Улічска долина і безпрофітовов орґанізаційов Карпатьскы деревяны церькви. Выставка буде презентовати кірілічны памяткы сниньского реґіону.

Выставка буде мати свою вернісаж в пятніцю 16-го децембра 2016-го року о 17.00 год. в просторах сниньского каштелю і буде єй мож видіти аж до 6-го фебруара 2017-го року. Куратором є Мірослав Бураль. Фахово на тій выставці співрацовали Даніела Капральова і Даніела Ґаландова.

В рамках одкрытя выставкы буде мож выслухати і лекцію Мірослава Бураля під назвов Кірілічны памяткы сниньского реґіону і їх обновльованя. О святочный музичный проґрам на одкрытю постарать ся Хор коло Православной парохії в Снині.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА