В суботу одбуде ся день народів і народностей в Старій Любовні

День народів і народностей Пряшівского самосправного краю є назва події, котра зачне писати свою історію в суботу 30-го септембра 2017-го року. Подія є присвячена розвитку културы народностных меншын, котры жыють в Пряшівскім краю і їй першый річник одбуде ся в Старій Любовні.

Подія буде одкрыта вернісажов выставкы народной творчости, уменя і народностных особливостей в ґалерії Провінчный дім зо зачатком о 9.30 год. На выставці будуть і творы членів народностных меншын, респ. творы, котры характерізують окремы народы і народносты, котры жыють в тім реґіоні.

О 10.30 год. перед Окресным урядом в Старій Любовні зачне ся културный проґрам, на котрім будуть брати участь репрезентанты окремых култур. За карпатьскых Німців выступить колектів Молодый Мармон із Хмельниці, Облик із Ганушовець над Топльов представить словацьку културу із історічного реґіону Земпліна, ґоральска култура буде презентована колектівом Долина Попраду із польской Пивнічной, Ансамбель Українців Закарпатя з Мукачова прийде одпрезентовати културу Українців. Своїх представителів будуть мати і ромска і жыдівска културы. За першых беруть на проґрамі участь Кгесай Чгаве з Кежмарку і жыдівску културу, або фраґменты з ньой, одпрезентує Ваґонар із Попраду. Люди будуть годны видіти і русинську културу, котру до Старой Любовні із Свідника принесе колектів Маковіця.

В рамках події одбуде ся і кройованый поход містом, котрый зачне о 15.30 год. Траса є встановлена од Намістя св. Николая аж ку Окресному уряду, де о 16.30 зачне головный ґалапроґрам. В нім ся одпрезентують вшыткы спомянуты колектівы, як і далшы ансамблі ці солісты з реґіону.

Першый річник Дня народів і народностей Пряшівского самосправного краю бы мав быти зачатком довгорічной традіції і його далшы річникы бы ся мали орґанізовати все в іншім місті Пряшівского краю. Тот рік о орґанізацію постарали ся Любовняньскый освітній центер і місто Стара Любовня.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА