Голосник

В ТАД рихтують Детектор лжи

Русиньскый Театер Александра Духновіча рихтує свою далшу, вже третю премєру в театралній сезоні 2019/2020. Драматічный колектів до свого драматурґічного плану выбрав пєсу сучасного російского автора Василія Сиґарєва під назвов Детектор Лжи.

Пєсу режійно приготовлює в нашім театрі вже знамый режісер Светозар Спрушаньскый, котрый про Духновіча векшынов робить пєсы росісйскых авторів. О русиньскый переклад ся тот раз постарав Валерій Купка. О чім буде нова інсценація? Прозрадить нам їй анотація.

Детектор лжи

Повісте собі, же о манжелстві знате вшытко? Досправды то так є? Або… Може о манжелстві не знаме абсолутно нич? І манжелство може быти єдна велика незнама… А притім прекрасна комедія!

Находиме ся у обывачці єдного класічного панелакового квартелю. Пані Надежда не знать найти одповідь на вопрос: Де мій муж Борис скрыв выплату? І так собі на поміч закличе домів гіпнотізера. Має пояснити справы, котры суть на першый погляд баналны. А пізніше і фаталны. Бо уже по хвілі знайде ся меджі небом і земльов. Ліпше повіджено – посеред таємніць тридцятьрічного манжелского одношіня. Тадь хто бы ся сперав покушіню спознати істинну правду і скрыты світы свого ціложывотного партнера? Нихто. І втогды ся іщі лем почнуть діла! Минулость шокує нашых героїв, метать їх до неочекованых сітуацій. Но публіка ся барз файні бавить!

Та ці то в жывоті аж така перемога? Дізнати ся о нашых близкых досправды вшытко? Тверду правду? Як скінчіть тота сеанса несподіванок? Подарить ся загасити тот ґротесковый пожар манжелскых боротьб? Буде годен в многім простодушный гіпнотізер втечі із пазурів манжелского абсурду?

Так лож, як і туга розкрыти правду, єдно і друге може быти про нас солодков наркотіков, котра ся за секунду змінить на смертну отрову.

Успішній комедії зо сучасности домінують брілантны акторьскы выконаня протаґоністів русиньского театру. Суть поставлены на текстовій і сітуачній перемінливости. На бавліню ся. На дінаміці акторьской кооперації, іскривости словных несподіванок.

Значіть! Театралный вечур повный доброй забавы, усміху, котрый вам з часу на час замерзне на роті, сміху і радостного обчутя ся може зачати!

Василій Сиґарєв

Василій Сиґарєв (1977) є сучасный російскый філмовый режісер, сценаріста, і драматурґ. Є лавреатом премій (по російскы, позн. ред.) Дебют, Антибукер, Эврика, Новый стиль і Evening Standard Awards. Пєсу, котра теперь буде мати премєру і в русиньскім театрі в Пряшові, написав у 2005-ім році і оріґінална назва є Продаётся детектор лжи.

Премєра

Інсценацію Детектор лжи бы мав Театер Александра Духновіча одпремєровати в пятніцю 3-го апріля 2020-го року. Кедьже суть моментално з причіны надзвычайного стану заказаны вшыткы културны події, о тім, ці буде премєра проходити в напланованій даті, будеме інформовати.

Жрідло фотоґрафії: derbypolygraphservices.com.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі