В Тополі оправлять нагрoбный камінь Духновічового прадіда

В половині місяця юл оголосила на своїм фанпейджі на сіті Facebook безпрофітова орґанізація Карпатьскы деревяны церькви (Karpatské drevené cerkvi, n. o.) голосованя під назвов Жебы ремесло жыло (Aby remeslo žilo).

Орґанізація здобыла суму 3000 € од Фундації VÚB, вдяка котрым хоче зробити три ремеселны воркшопы заміряны на дерево і камінь, і оправити так три выбраны памяткы в реґіоні Снина, котры представлюють память той країны. Єдночасно тыма воркшопами хоче орґанізація вышколовати містных людей, вдяка котрым ся културна дідовизна реґіону всокотить і про далшы ґенерації.

На поміч, котры памяткы выбрати на реконштрукцію, закликали собі своїх любителів на сіті Facebook. Довєдна было номінованых сім обєктів у трьох катеґоріях: Камінь – оправа текстів, Камінь – спевніня матерії і клеїня, і Деревяный шындель. До першой катеґорії были номінованы пісковцьовый крест у селі Шмиґовець і такый самый крест в селі Прислоп. В другій катеґорії мож было голосовати за нагробный камінь Василя Духновіча, пароха в Тополі і прадіда Александра Духновіча, нагорбный камінь Ота Гайдінґера, котрый быв справцьом маєтку родины Серенійовых і головным ініціатором выбудованя церькви в селі Дубрава, і пісковцьовый крест в селі Колбасів. В катеґорії деревяного шындлю ся голосовало за Ґрекокатолицьку церьков св. Ґеорґія в селі Ялова і деревяну дзвініцю з Калной Розтокы.

Подля резултатів голосованя, котре закінчіло о півночі 20-го юла 2018-го року, орґанізація Карпатьскы деревяны церькви в близкім часі постарать ся о реконштрукцію пісковцьового кресту в Шмиґовці, нагробный камінь Василя Духновіча і церьков в селі Ялова.

Карпатьскы деревяны церькви

Безпрофітова орґанізація Карпатьскы деревяны церькви была заснована у 2012-ім році на прінціпі партнерства самосправ і обидвох церьквей выходного обряду (ґрекокатолицькой і православной).  Орґанізація ся замірявать на гляданя достойных способів хоснованя церьквей в припадах, кедь їх із різных причін не мож хосновати на богослужіня. Окремо ся орґанізація орьентує на самосправы з цільом ефектівно схосновати потенціал деревяной церьковной архітектуры про розвиток економічно слабшых пригранічных реґіонів. Із той причіны є векшына актівностей в сучасности концентрована на окресы Снина і Собранці.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА