В Устю Рускым нова сідиба поліциі

В Устю Рускым офіцийні одкрыли новопобудуваный постерунок поліциі. В подіі, што прошла 17. липця/юлия, участ взяли представникы найвысшых державных власти на челі з Маршалок Сойму Ельжбєтом Вітек.

На одкрытю окрем Маршалок Ельжбєты Вітек присутны были і інчы посланкыні і посланці партиі Права і Справедливіст, а то: Барбара Бартусь, Ельжбєта Зєліньска, Патрик Віхер і Аркадиюш Мулярчык. До Устя приіхал і сенатор Віктор Дурляк. Товаришыли ім представникы власти поліциі, надінспектор Дариюш Авґустиняк, надінспектор Михал Ледзьон та Повітовый Комендант Поліциі в Ґорлицях, мл. інспектор Дорота Токаж.

Были присутны так само представникы самоурядовых власти, представникы найважнійшых інституций в реґіоні та католицкій і православный священникы.

«Новый постерунок буде служыл головні мешканцям і штораз чысленнійшым туристам, што приходят в Низкій Бескід. Вірю, што заанґажуваня і добра робота функцийонерів дозволит вшыткым чути ся гев безпечні» – бесідувал надінспектор Михал Ледзьон, шеф малопольской поліциі.

Ключы до нового обєкту принял кєрівник постерунку штабовый аспірант Славомір Добек

«В тоты терены приходит штораз веце туристів і барз ся з того тішыме, але вшыткы – мешканці і туристы, хотят ся чути досправды безпечні. Завдякы тій сідибі будете мати добры условія до службы» – підкрислила маршалок Сойму.

Нова сідиба устяньскых поліциянтів коштувала веце як 5 млн зл. Стара сідиба од веце як 40 років находила ся в мешкальным будинку, часово лем заадаптуваным на потребы постерунку. Поміщыня были малы і тісны, што неґативні влияло на комфорт роботы вчас переслухань і приниманя інтересантів. Будинку не оплачало ся ремонтувати.

Нова сідиба находит ся під адресом Устя Рускє 160. Терен діяня поліциянтів обнимат атракцийну туристичні обшыр ґміны Устя Рускє, што безпосередньо прилігат до границі державы зо Словацийом.

Маршалок Вітек обіхала повіт

По передполудньовым одкрытю постерунку в Устю Рускым маршалок Вітек переіхала до сусідньой Высовы, де взяла участ в повітовых торжествах свята поліциі, вчас котрых вручыла парудесятьом поліциянтам ґорлицкого повіту номінациі на высшы службовы ступени.

Дальшым елементом візиты на полудни была стріча з жытелями Ґорлиц, зорґанізувана посланкыньом ПіС Барбаром Бартусь. Вчас выступліня Маршалок подякувала за дану поміч і солідарніст з украіньском нацийом. В своім выступліню бесідувала о ситуациі за східньом границьом, проґрамах реализуваных урядом власти, особливо тых, што дедикуваны дітям і сеньорам.

Фот. gorlice.naszemiasto.pl