Валерій Падяк в Саноку

В середу, 25. жолтня/октобра т.р., в аули Державной Высшой Професийной Школы в Саноку пройде стріча з русиньскым науковцьом, карпатознавцьом та выдавцьом – Валерійом Падяком. В проґрамі тригодинной подіі, окрем стрічы з дослідником, передвиджены сут дальшы пункты.

О 16.00 год. буде мож выслухати доповіди нт. істориі і культуры Карпатской Руси. Дальше, по короткій перерві, пройде проєкция фільму про Русинів жыючых на Пряшівскій Руси. Посліднім пунктом проґраму буде презентация двох публикаций тыкаючых ся русиньскых тем, якы вказали ся в польскым языку.

Першом з книжок буде нова публикация Валерія Падяка, яка мат наголовок «Істория карпаторусиньской літературы». Другом буде знана робота проф. Павла Роберта Маґочія – «Народ нивидкы», яка в тлумачыню до польского языка вышла перед двома роками.

Премєра «Істориі карпаторусиньской літературы» Падяка проходила початком серпня/авґуста т.р. вчас ХХХVII Лемківской Ватры на Чужыні.