Варголь два разы

В 30. річницю смерти Енді Варголя Осередок Артистичных Діянь в Пьотркові Трибунальскым припоминат жытя і творчіст русиньского артисты. В тым тыжни зорґанізує дві подіі, цілю котрых єст популяризувати ґрафічну техніку хоснувану в «Фабриці».

23. лютого/фебруара на 19.00 год. ОАД просит до кіна на фільм пн. «Дівка з фабрикы». Біоґрафічний фільм з 2006 р. в режысериі Джорджа Гікенлюпера є про американьску акторку – Еді Седжвік – інспірацию і музу Енді Варголя. Молода Седжвік перерыват студиі і выізджат до Ню Йорку, де хоче остати модельком. Пак стрічат Варголя і скоро остає його улюбленом Warhol superstar. Седжвік грала во фільмах Енді, публично ся вкзувала довєдна з ним як пара в єднакым облечыню. По короткым часі, з огляду на поступлююче узалежніня акторкы од наркотиків, розлучыли ся на все.

Вступ на фільм дармо.

Друга подія зрыхтувана Осередком Артистичных Діянь то варштаты робліня варгольовых ґрафік, якы пройдут 26. лютого/фебруара 2017 р. од 10.00 до 14.00 год. Коли бы дахто хотіл зробити сой свій надрук на кошельці або торбі, то єст прошений на варштаты решетового друку. Вчас імпрезы буде мож ся дознати про творіня ґрафік і рыхтуваня з них шабльонів, якы дале мали бы послужыти до робліня мастерскых робіт. Варштаты перезначены сут ся діти і дорослых. Вшыткы імпрезы пройдут в ОАД в Пьотркові, ул. Домбровского 5.

Вступне на варштаты 20 зл.