Варголь, Новосільскій, Двурнік до купліня

Роботы клясиків передвоєнной ґрафікы та сучасных артистів будут ліцитуваны на Авкциі Артистичной Ґрафікы 15. лютого/фебруара 2018 р. в ґалериі DESA Unicum в Варшаві.

На авкциі найде ся 181 обєктів давного і сучасного мистецтва, од ксилоґрафік через аквафорты, мідьорыты по сучасны серіґрафікы. Сут то ґрафікы клясиків передвоєнного польского мистецтва, м.ін. творы Леона Вычулковского, дві барз рідкы і інтересуючы офорты Юзефа Панкєвича з Франциі, творы Зофіі Стриєньской, Юзефа Мегофера ци Теодора Аксентовича.

Лютову авкцию ґрафік поділено на дві части: давне і сучасне мистецтво – ліцитувати буде мож тіж творы Пікассо, Шаґаля ци Варголя. Серіґрафіка русиньского короля поп-арту Marilyn Monroe – комплет штырьох ґрафік то добрі знаний в популярній культурі вид славной акторкы – ліцитуванa буде од 3600 зл, а 5000 зл то початковы ціны серіґрафік Юрия Новосільского. Купити буде мож і 4 фаребны серіґрафікы: Акт, 1999 р., Музыка ночом, 1999 р., Жены з зеркалом та Акт з зеркалом. Рахуваний ціновий переділ, за котрий будут проданы творы то: 8000-13000 зл. В примірі серіґрафікы Варголя то 5000-7000 зл (выставлена робота складат ся зо штырьох окремых ґрафік, кажда мат выміры 91х91 цм).

На авкциі буде мож купити тіж ґрафіку інчого артисты сучасного мистецтва – Едварда Двурніка, котрий в своій творчости інспірує ся м.ін. роботами Епифана Дровняка.

Вшыткы можливы до зліцитуваня творы находят ся на сайті desa.pl.

 Фот. за: desa.pl