Варголь в Лодзі

Атляс Штукы, вельократно вызнаний найліпшом ґалерийом в Польщы, уж 13 років являт ся важным культуральным місцьом на мапі Лодзі. За тоты рокы перевинули ся через порогы Ґалериі світовой славы артисты, такы як Дейвід Линч, Роман Опалка. Минулого рока были выставляны гын образы Юрия Новосільского.

До 5. червця/юнія т.р. мож видіти в Ґалериі тіж діла найвызначнійшого і найбарже знаного во світі артисты русиньского походжыня – Енді Варголя. Окрем робіт короля поп-арту, выставлены сут там роботы Жан-Мішель Бакія, Франка Стелі, Монікы Бонвічіні, Дана Флявіна, ци Стіва Макквіна.

Выстава єст приватном колекцийом Ерікы Гофман-Кеніґе, котра перший раз рішыла вказати єй поза границями Німец. До той поры лем раз вказувала єй поза своім берліньскым мешканьом – сім років тому в Дрездені. Наголовок выставы Ерікы Гофман-Кеніге то: «Мій выбір для Атляса Штукы з Колекциі Гофман». Збірка выбраных творів сучасной штукы представлена єст в суровий спосіб – запрезентуваний єст лем наголовок і автор діла. Подля слів амбасадора Німец, Рольфа Нікеля, якій дал коментар до выставы – слова в штуці не являют ся необхідныма. Подля амбасадора, штука через кольор, текстуру, запах, свій зміст, влият на простір, в якым єй поміщено, через інчы діла, з котрыма в рамках експозициі входит в інтеракцию, а тіж через досвідчыня адресатів, якы єй одберают.

Тото, як влият Варголь і інчы артисты сучасной штукы, до 5. червця/юнія мож провірити в Ґалериі Атляс Штукы в Лодзі (ул. Пьотрковска 114/116).