Голосник

Варголів музей ламле рекорды

Музей модерного уменя Енді Варгола в Меджілабірцях навщівило почас місяців юл і авґуст 2020-го року понад 12 700 навщівників. Є то абсолутный рекорд дотеперішньой навщівности за 29 років існованя той інштітуції. Про аґентуру TASR то повів директор музея Мартін Цубяк.

„В середнім чіслі музей денно навщівило в місяцях юл і авґуст 212 навщівників, найвеце їх было 468, і то 5-го авґуста, коли сьме мусили реґуловати вступы, жебы были дотриманы гіґєнічны наряджіня,“ повів Цубяк.

Подля слов директора ся їм сповнив малый сон о навщівности, котрого реалну подобу є видіти з часу на час в загранічу, кедь на вступ до музею треба чекати в шорі.

Найвеце домашніх, помогли проєкты

Найвеце навщівників было домашніх – із Словакії, спомеджі загранічных їх было найвеце з Польщі, конкретно 1082. Минувшый рік почас літніх місяців мав музей довєдна 7457 навщівників.

І кедь вже в януарі Варголів музей навщівило о 100 процент навщівників веце в порівнаню з попереднім роком, Цубяк приписує рекордну навщівность почас літньой сезоны двом пропаґачным проєктам.

Єдным з них є авдіовізуална серія COVID-EO project, на котрім музей співпрацовав з Факултов умень Технічной універзіты в Кошыцях, другым є 150 сітілайтів, котры мож видіти од Братіславы по Гуменне в рамках проєкту Підпоруєме уменя, і быв резултатом співпраці музея з орґанізаційов К13 – Кошыцькы културны центры і платформов медіалного уменя МАО.

Музей так само в рамках мултімедіалной выставкы зачатком юна пожычав творы street-art умлеців Банксіго і Поппі до Kunsthalle Кошыці.

Інтерес быв о Гарінґа

Тяглом про навщівників была і выставка творів світовой особности в уменю, Кеіта Гарінґа.

„Выставный простор почас пару тыжднів змінив ся на єден великый монументалный твор з понад 2000 мальованыма танцуючіма фіґурками, котры были головным візуалным елементом выставкы, і на стіну, підлогу і плафон експозіції были мальованы ручні,“ доповнив директор.

Як закінчів, музею ся і наперек коронакрізі подарило зреалізовати і меджінародный проєкт. В польскім Коросні была 21-го авґуста одкрыта выставка під назвов Andy Warhol’s Life and Death.

Актуално музей Варгола окрім своїх стабілных експозіцій має і выставку 29-ох умелецькых творів од 22-ох великобрітаньскых авторів, котры протестують проти войны і будьякой формы ґвалту під назвов Пекелный мір.

Жрідло фотоґрафії: Музей модерного уменя Енді Варгола.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі