Варголів музей має рекордне чісло домашніх навщівників

Музей модерного уменя Енді Варгола в Меджілабірцях навщівлпює од зачатку літніх вакацій рекордне чісло домашніх турістів. Музей є першый з двох у світі і єдиный у Европі.

Як про аґентуру TASR повів директор музею Мартін Цубяк, покля в минулости были найчастішыма навщівниками турісты з Польщі, за котрыма наслідовали жытелі різных европскых держав, тото літо ходять головно люди із Словакії. З літніма подіями притім музей іщі ани не зачав.

Рекорды і вдяка кампані

„В понедільок 6-го юла сьме мали дотеперішній рекорд, 317 навщівників. Музей офіціално заперать о 16.00 год., но мали сьме втогды одкрыто до 18.30 год. і мусили сьме реґуловати вступы,“ повів о затля найве успішнім дню Цубяк. Додав, же окрім людей із Словакії в тот день мали і навщівників із Польщі а Чеськой републікы.

Цубяк видить за векшым чіслом домашніх, котре є почас тыждня коло сто і почас вікендів коло 200 людей, маркетінґову кампань, з котров музей зачав почас пандемії, коли быв примушено запертый. Відеосерія, котра є доступна в службі Youtube пропаґує умелців, котрых творы мож видіти в Меджілабірцях.

Найвекшым тяглом того літа має быти окрім стабілной експозіції і выставка особности америцькой underground сцены 1980-ых років Кеіта Гарінґа. Гарінґ ся у своїх творах занимав темами Апартеіду, епідемії AIDS ці проблематіков людей завислых на наркотіках. Выставка Radiant World  в Музею модерного уменя Енді Варгола в Меджілабірцях, на котрій буде мож видіти 40 творів Кеіта Гарінґа, є подля Цубяка затля найвекшов експозіційов того умелця на Словакії.

Буде сприступнена 21-го юла 2020-го року, но з причіны пандемії не буде проходити класічна вернісаж. Почас цілого дня будуть доступны двоми аж трьоми кураторы музею, котры будуть забезпечовати навщівникам коментовану переглядку.

Продовжує і проєкт Stage

Події в рамках проєкту Stage в літі зачнуть 23-го юла. „Іншпіруєме ся все даяков датов у конкретнім місяці, котра є якымсь способом повязана будь з Енді Варголом або з умелцьом, котрого образы можуть навщівници в музею видіти,“ повіла про аґентуру о проєкті, котрый музей реалізує од фебруара того року, музейоедуколоґічка і помічна кураторька Кармен Ціліпова.

Першыма, кым будуть в музею занимати ся, суть street art умелкыня Бамбі і їй муза Еймі Вайнгаус, котрой смерть собі світ припоминать якраз 23-го юла. О штири дні пізніше буде головнов особностьов коментованой переглядкы і супроводного вытвартного варштату Мік Джеґґер, котрый буде мати 27-го юла 77 років.

Жрідло фотоґрафії: muzeumaw.sk

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА