Варшаты писаня ікон в Любіні

Православна парафія Святой Тройці в Любіні запрашат молодіж та дорослых на осінны варштаты писаня ікон. Подія одбуде ся в днях 5.-10. жолтня т.р., в катехетычній сальці при любіньскій плебаніі. Занятя будут одбывати ся медже 16.00 а 20.00 год.

Чысло місц ограничене (20 ос.), а записати ся мож пишучы на cerkiew_lubin@op.pl, або дзвонячы на номер 503-72-20-02.

За тым мотузком можете пізрити на фотореляцию з варштатів писаня ікон в 2009 р.

Православна парафія в Любіні офіцийно была основана 9. січня 1951, коли по долгых старанях Уряд до справ вызнань передал любіньскій громаді поевангелицку святыню. Неофіцийно, першы літургіі одбывали ся уж од 1949 рока, коли то на богослужыня доізджал о. Йоан Левяр з Зимной Воды. До 1958 рока церков в Любіні была філийом парафіі в Зимній Воді. В більшости любіньскы парафіяне то Русины, котры остали выгнаны в 1947 році з рідных сел на Лемковині. Долголітнім настоятельом любіньской церкви был добрі знаний лемківскій соспільности, о. митр. Михал Жук, котрий народил ся в 1939 році в лемківскым селі Перунка. Од 30. січня 2006 рока функцию пароха повірено о. Богданови Репелі. При парафіі, од 2007 рока вчыт ся лемківского языка. Днес, любіньска православна парафія чыслит около 350 осіб.