Вечер з Древутньом. XIII Лемківскій Вечер в Коросні

Тілько што, бо перед тыжньом, Коросняне, але і заінтересуваны з дальшых стран, стрітили ся в рамках Лемківского Вечера, а орґанізаторы заявляют о черговій такій стрічы – і то уж о тыжден!

В пятницю 29. вересня/септембра пройде ХІІІ Лемківскій Вечер в Коросні. Выступит капеля Древутня.

Лемківскы Вечеры то ініциятива Анны Романьчак і Пшемка Поляньского, якы од 2004 рока, што якісый час скликуют люди на спільну гостину, музикуваня осаджены близко лемківской спадковины.

«Поставили сме на стрічы люди, котры барз люблят ходити по горах, люблят Низкій Бескід, сут захоплены культуром, кухньом і музиком Лемків» – оповідат Пшемек Поляньскій.

На першу стрічу пришло парудесят осіб, а на каждій наступній было веце, николи менше. Кажда зо стріч проходит довкола якісой темы. «Через даякій час др Тадеуш Лопаткєвич вюл прелекциі, котрых темы выдумувал Пшемек. Были то напр. Лемківска собітка, Стрічы на Бескіді ци Страх на Лемковині» – споминат Анна Романьчак. «Подібні было з лемківском кухньом. Заходиме до жытелів лемківскых сел, збераме рецептуры на смачны, хоц просты, стравы, котры пак сервуєме участникам подій» – оповідат орґанізаторка.

На Лемківскых Вечерах николи не бракує музикы. Дотепер выступували м.ін. ґрупа А Де То Давнійше Строіло, Замішанці ци Капеля Спід Рубані. Концерты найчастійше переходят в спільне музикуваня, танцюваня, а тіж – плянуваня гірскых вандрівок по закутинах Лемковины.

Вчас надходячого Лемківского Вечера выступит добрі знана капеля Древутня. «Граме творы інспіруваны традицийном музиком земель ІІ Польской Республикы, особливо з теренів, де стыкали ся і проникали ріжны культуры і традициі. Одтале в нашым репертуарі і лемківскы, руснацкы, украіньскы пісні, як і пісні люблинчской, шлеззкой земель ци з Малопольщы» – пише на своім сайті Древутня.

На інструментариюм ансамблю складают ся інструменты присутны в польскій народній музиці, особливо в традицийній музиці Люблинщыны, де осіли музикы і наштоден жыют і творят, але члены ґрупы хоснуют тіж тоты інструменты, што знаны з інчых реґіонів. Характерне для Древутні є, што лучыт славяньскій фольклор з авторскыма аранжациями і особливым лучыньом інструментів. Музикы сігают по акордеон, бубен, гушлі, мандолину, сопілку, балалайкы, дуды, але тіж по білгорайску суку, полудньово-американьскє реко-реко ци монґольскій тошпулюр.

ХІІІ Лемківскій Вечер продйе в пятницю 29. вересня/септембра в Парковій Реставрациі в Коросні. Вступне 30 зл. Обовязує резервация місц: +48 515 355 494.