Великдень у Русинів – тематічна выставка в музею

Як інформує офіціалный сайт, Словацькый народный музей – Музей русиньской културы в Пряшові одкрыв днесь выставку під  назвов Великдень у Русинів.

Выставка з великодньов тематіков вже традічно є шторік орґанізована русиньскым музейом. Є присвячена русиньскым традіціям і звычаям почас Великодня – Пасхы. Навщівникам хоче музей посередництвом експозіції приближыти приготовліня пасхального кошыка, приготовліня страв, традічны рецептуры, но вказаны суть і реліґійны обряды повязаны із тым найвешкым хрістіаньскым святом. На выставці не бракують ани харектерістічны писанкы, вказаны суть стародавны і модерны технікы крашіня яєчок.

Выставку буде мож в Словацькім народнім музею – Музею русиньской културы видіти аж до 15-го мая 2017-го року.

Єдночасно музей інформує і о зміні робочіх годины почас Великодных свят. Останім робочім дньом буде в музею Великый четверь, 13-го апріля, коли го можете навщівити і посмотрити експозіції од 9.30 до 15.00 год. Музей пак одкрыє свої двері аж у віторок, 18-го апріля.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА