«Великє Одкрываня Малопольщы 2015» – выграла ґміна Санкова!

Як заявлят сайт www.naszemiasto.pl, ґміна Санкова выграла плебісцит «Великє Одкрываня Малопольщы» 2015. О голосуваню інформували сме за тым мотузком.

Одкрываня Малопольщы в буд-якым просторі, то по части і одкрывананя териториі західньой і середньой Лемковины. Так было і тым разом – в проґрамі голосуваня нашли ся пропозициі объєктів, місц, подій, актракций, а може і люди, котры в меньшым або векшым чыслі сут повязаны з Лемками і іх крайом.

Окрем престіжу і розпропаґуваня, лавреат катеґориі Особливе Місце – місцевіст/ґміна достає аж 50 тис. зл., в катеґориях Малопольска Особовіст Туристыкы та Туристычний Провідник для лавреата зрыхтувано по 5 тис. зл. Выграны в наступных катеґориях можут рахувати на почесну грамоту і славу.

Лемківскы пропозициі, котры ся нашли в тогорічній едициі плебісциту, то м.ін, в катеґориі Особливе Місце: ґміны Устя Рускє і Санкова, в катеґориі Туристычна Атракция: Пут деревяной архітектуры,  На гостині, місце до мож зісти і спати: номінуваны м.ін.: Готель Гостинна Хыжа в Высові. То лем част выміненых нами катеґорий, кєд цікавит Вас більше клікнийте в сес мотузок.

Тогорічну едицию плебісциту «Великє Одкрываня Малопольщы» выграла єдна з лемківскых пропозиций, т.є. ґміна Санкова, котра завершат в своій обшыри лемківскы села, Лемків і іх материяльне дідицтво. Припомнийме, же в ґміні Санкова находит ся єдна з лемківскых церкви вписана на Листу Світового Дідицтва ЮНЕСКО – то храм Покровы Пресвятой Богородиці з Рыхвалду. Веце про богатство ґміны і великій доробок поколінь Русинів оповідат війт ґміны Санкова Малґожата Малух – клікнуйте в тот мотузок.