Верховина святкує 25-літя істнуваня

Уж заран во Варшаві буде проходил концерт з нагоды ювілею 25-літя істнуваня ансамблю Верховина. Ансамблю, якій на тамтот час, коли был оснований, был єдным з першых, попри Оркєстрі св. Миколая, вказуючых шыршій польскій публиці красу лемківскых співанок.

Верховина зродила ся в 1991 р. в ґрупі приятелів, знаємых – студентів варшавскых університетів, звязаных з середовиском Студентского Кружка Бескідскых провідників. Початково ансамбль співал головні лемківскы і украіньскы співанкы, зачуты вчас вандрівок по горах, пак додал до них іщы білорускы і росийскы та зрезиґнувал з інструментів, зосереджаючы ся на співі акапеля. На своім конті мают 2 касеты (Верховина 1993, Тече річка 1995) і 6 платен ЦД (Криниченька 1996, Верховина ляйф 1999, Ой зза горы 2000, …гей коляда, коляда 2002, Святы та грішны співанкы 2005, Козацкы співанкы 2015). Остатня, печатана минулого рока, о тілько цікава, же награна лем в мужскым складі.

Верховина была гостьом вельох етнічных фестівалів в Польщы, м.ін. на ватрі в Михалові, Фольковых Стрічах з Сельского Подвіря в Черемсі ци на Фольковых Миколайках в Люблині. Тепер ансамбль концертує уж барз рідко, але што рока, почавшы од 1993 р., мож почути Верховину на ґальовым концерті в Репрезентацийній Сали Варшавской Політехнікы, де выступуют лем при світлі свічок.

Ювілейний концерт проходил буде заран, то є 22. жолтня/октобра, в Кіні Електронік в Варшаві. В проґрамі концерту найдут ся выбраны творы з репертуару 25 років музыкуваня, выступлят тіж приятелі, котры колиси співали або грали з Верховином.

фот. горі: П. Новачек, фб-профіль ґрупы.