Голосник

Вернули роботы при будові дорогы С3 на одтинку Польковиці-Любін

Перед парома днями вкінци рушыли роботы на пляци будовы експресовой дорогы С3 (S3) під Любіном. Робітникы, котры мали ввойти з роботом в половині марця, зо взгляду на пошырюючу ся пандемію коронавіруса не зробили того і не было знатя, коли рушат роботы.

Єднак 2. квітня/апріля тр. машыны урухомлено, появила ся екіпа. Аж в листопаді/новембрі минулого рока розвязал ся проблем на докінчыня нещестного одтинка дорогы С3 медже Польковицями а Любіном. Ґенеральна Дирекция Доріг і Автострад підписала товды догваріня з выконавцьом. Роботы на одтинку коло 14,5 км реалізує консорциюм фірм Mota-Engil Central Europe – лідер, Masfalt та Drogomex – партнеры. Вартіст то близко 228,4 млн зл. Выконавця мал мати 12 місяців на докінчыня дорогы, з вылучыньом зимовых місяців, але через пандемію закінчыня робіт плянуване на другій квартал 2021 рока певністю ся пересуне.

Фраґмент дорогы медже Польковицями а Любіном не має щестя. Термін закінчыня робіт был уж вельократні переношеный. Попередній выконавця, італияньска фірма Salini, свій поворот на будову по зимовій перерві зробил залежный од отриманя додатковых грошы, на што не пристала Ґенеральна Дирекция Доріг і Автострад. Тым більше што выконавця вюл контракт незгідні з догваріньом, не дотримувал термінів і не платил підвыконавцям, доставцям материялів ци інчым услугодавцям.

ҐДДіА нарахувала дотеперішньому выконавци кары, выходячы з догваріня, высокости 84,5 млн зл за перекрочыня терміну закінчыня робіт. Квота може ся іщы збільшыти. Докладну высокіст будут знати по довершыню процедуры розрахуваня робіт.

Фот. Ева Хойна, lubin.naszemiasto.pl

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Штоденньо од 11.00 год. веде lifestyle'овый проґрам «Пачісна година» , а в суботы о 9.00 год. чытат для Вас порталь. Контакт: natalia@lem.fm

Коментарі