Via Carpathia богатша о штырі новы державы?

Проєкт будовы єдной з важнійшых доріг в Европі, котра перетинат цілу Польщу, має новых союзників. То може помочы в терміновій реалізациі інвестициі.

Анджей Адамчык, міністер інфраструктуры, поіформувал о поступах в роботах над путьом Via Carpathia, єдным з важнійшых в Еворпі, котрий получыт Литву з Грецийом. За пару тыжнів штырі державы мают задеклярувати охоту спілучасти в проєкті: Білорусь, Босня і Герцеґовина, Хорвация та Сербія. Рішыня приступити до інвестициі, ідею котрой опрацувано в 2006 році в Польщы, може помочы забезпечыти середкы з Евросоюзу. Via Carpathia має быти неодолга вписана до проґраму Трансевропейской Транспортовой Сіти (з анґ. Trans-European Transport Networks, TEN-T). ТТС то унійний проґрам тыкаючий дороговых, желізницьовых, водных і повітряных сіти. Його цілю єст координувати та забезпечувати спійніст і взаімне дополняня ся інфраструктуральных інвестиций на обшыри Европейского Союзу. Коли Via Carpathia трафит до ТТС буде мож мати переконаня, што вшыткы фраґменты шляку будут дофінансуваны Евросоюзом.

Польска част дорогы Via Carpathia рахувати має близко 700 км. Вести буде она через цілу обшыр державы – через Білосток, Люблин і Ряшів, перетинаючы Лемковину до переходу в Барвінку. Більшіст трасы становила буде крайова дорога С19. Закінчыня будовы в Польщы предвидує ся на 2025 рік. Міністерство Інфраструктуры заявило, што має уж ціліст середків на будову Via Carpathii на обшыри Польщы – близко 700 км має коштувати 30 млд золотых.

Будова такого дорового путу з пілночы на полудне не для вшыткых експертів єст обґрунтувана. В Польщы і Середній Европі економічны повязаня ведут головні на оси схід-захід, а не пілніч-полудне. При такым укладі пропонуют в першым ряді довершыти автостраду А2, котра не кінчыт ся іщы при польско-білорускій граници. Експерты видят єднак вартіст в добрым получыню зо Словацийом, котре буде частю Via Carpathii. Факт, же тот пут нашол бы ся в пляні TТС і фінансуваний был бы Евросоюзом, дозволил бы перенести державны середкы заняты на тоту ціль на будову інчых доріг.

За: gddkia.gov.pl, next.gazeta.pl, money.pl