Вігорлатьскый музей пририхтовав Рождество в музею

На 12-го децембра 2022-го року пририхтовав Вігорлатьскый музей в Гуменнім продовжіня свого довгодобого проєкту з назвов Рождество в музею. Подія одбуде ся в просторах ренесанчного каштеля і публіку чекать рождественный проґрам.

Вігорлатьскый музей в Гуменнім у співпраці з містом Гуменне в рамках сохраніня і розвиваня културных цінностей реґіону на події в концертній салі Вігорлатьского музея представлять календарь з назвов Ренесанчный каштель в Гуменнім 2023.

Презентація календаря буде звязана з презентаційов заміру розвитку міста Гуменне – кандідата на тітул Місто културы 2024.  Єдночасно то буде „принагода вказати на локалный, народный і єдночасно сполочный европскый характер културных цінностей реґіону,“ інформовала Яна Федічова з Вігорлатьского музея.

В рамках концертного проґраму одпрезентують рождественны навернутя ку цінностям културной дідовизны предків як часть културной традіції реґіону Вышнього Земпліна співацькы части Фолклорного колектіву Хемлон Гуменне – мужска співацька ґрупа Гачуре і дівоча співацька ґрупа Босорочкы.

В рамках події Рождество в музею будуть навщівници годны в Ґалерійній салі Ореста Дубая посмотирти собі і в тот день одкрыту выставу з назвов До нового року… Выстава презентує найкрасшы календарі Словакії за 2022-ый рік і добовы рождественны і новорічны поштовы карткы.

Выставльованы календарі представлюють колекцію оціненых словацькых найкрасшых календарів в престіжнім цілословацькім конкурзі з назвов О найкрасшый календарь Словакії.

Колекція рождественых чорнобілых і фаребных поштовых карток є выбером добовых карток з фонду архівалій Вігорлатьского музея. Добовы поштовы карткы в подобі мальованых мотівів, фотоґрафічных іншталацій і репродукцій знамых вытварных творів з рождественнов і новорічнов тематіков черьпають з біблічных текстів, природных і рождественных мотівів.

Выстава До нового року… буде в просторах Вігорлатьского музея в Гуменнім приступна до 31-го януара 2023-го року.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА