Віцемаршалок Малопольского Воєвідства з Нагородом Пряшівского Самосправного Краю

В часі торжества в Театрі ім. Йонаша Заборского в Пряшові Віцемаршалок Малопольского Воєвідства Вітольд Козловскій одобрал з рук пряшівского жупана Міляна Маєрского Нагороду Пряшівского Самосправного Краю 2024.

То нагорода признана для Малопольского Воєвідства, як доказ вдячности за долголітнє партнерство і спільны ініциятивы. Обі самоурядовы єдиниці од 20 років успішні реализуют спільны проєкты, в тым тоты, котры промуют туристику і культуру. Делеґация з Малопольского Воєвідства была особисто присутна на ґали, вчас котрой вручано Нагороды Самосправного Пряшівского Краю.

«Барз дякую за признане выріжніня. То черговый доказ і знак нашой приязни. Предовшыткым дякую за барз добру спілпрацу протягом вельох років, за чысленны стріы і бесіды, котры будуют добры реляциі. Єм переконаный, што наша досконала спілпраца буде продолжана з корыстю для жытелів Малопольщы і Пряшівского Краю» – бесідувал Вітольд Козловскій.

Пряшівскій Самосправный Край єст єдным з головных заграничных партнерів Малопольщы. Минулого рока проходило 20-літя спілпрацы. «Лучыт нас не лем територияльна і языкова близкіст, але тіж культруна і соспільна. Думам, што неє другой так подібной до Польщы державы в культурным і меджелюдскым контексті як Словация. Чуєме тоту близкіст і жычливіст все, коли приходиме до Пряшівского Краю» – підкрислял віцемаршалок.

Оба реґіоны, богаты сут в мальовничы краєвидны, унікальны памятникы, такы як замкы, монастырі, музеі ци курорты. «Завдякы спілпрацы можеме ефективнійше промувати реґіон як ціліст, притігати туристів з ріжных части Европы і світа. Такы діяня, як творіня спільных туристичных пути ци орґанізуваня культурных подій, будуют атракцийніст обох реґіонів і підперают реляциі медже мешканцями» – ствердил.

Припомнийме, што минулого рока в жолтни/октобрі в Пряшівскым Краю прошло сильне землетрясіня. Катаклизм лишыл по собі великы знищыня. Самоуряд Малопольского Воєвідства передал мілийон злотых на поміч в одбудові. «Послідні рокы принесли вельо вызвань і надзвычайных, непредвидженых ситуаций, але все сме показували, же можеме на ся рахувати» – подал віцемаршалок Козловскій.

Нагороды Пряшівского Самосправного Краю признаваны сут од 20 років особам і інституциям, якы заслужыли ся для розвитку реґіону в державі і заграницьом в ріжных обшырях жытя. Минулого рока єдным з лавретів было м.ін. Підкарпатскє Воєвідство, доцінене за заанґажуваня в розвиток трансграничной спілпрацы і підпераня реґіону Карпат.

Нагородом Пряшівского Самосправного Краю єст твір штукы в формі ґотицкой брамы, зас Нагорода Председы Самосправного Пряшівского Краю припоминат людскє серце з крылами. Авторком нагорід єст різбярка Ева Фішерова.