Вкрали штырі Королевы, але дві вышмарили на улицю

До дост нештоденного вламаня дошло в Нідерляндах. Злодіі схоснували могучый експлозийный ладунок, жебы розбити входовы двері до ґалериі MPV в Ойстервейк в провінциі Пілнічна Брабанция. Там вкрали дві ґрафікы з сериі серіґрафік Енді Варголя.

Злодіі прібували вкрасти вшыткы штырі творы з сериі Варголя з 1985 рока з колекциі Reigning Queens. В збірку входят портреты товдышніх владарок Зъєднаного Королівства, Нідерляндів, Даніі і Суазі, котре тепер зове ся Есватіні.

Марк Піт Віссер, властитель ґалериі, повіл, што напад выімали камеры безпекы і было то барз «аматорскє» діяня. До вламаня дошло в ночы в четверга на пятницю 1. листопада/новембра.

Злодіі высадили входовы двері до ґалериі, але же цілый будинок єст зашкленый, вылетіли тіж праві вшыткы выгляды. Подля поліциі, схоснуваня выбуховых материялів то дост особлива метода в примірі злодійства творів штукы.

«Бомбовый атак был так сильный, же знищыл цілый будинок, а сусідні склепы тіж сут пошкоджены» – повіл властитель ґалериі. «Злодіі пак полетіли до авта, але вказало ся, што не змістят ся до середины… Товды ґрафікы вырвали з рам, відомо тіж, што сут міцно ушкоджены» – реляцийонувал.

Конец кінцьом злодіі вкрали образы, якы представляют королеву Єлизавету ІІ і королеву Маргариту з Даніі. Два дальшы портреты з сериі – портрет королевы Беатрікс з Нідерляндів і королевы Нтомбі Тфвалі з Есватіні лишыли на улици.

Серіґрафікы были зроблены в 1985 році, два рокы перед смертю Варголя. Віссер одмовил подати, яка є вартіст штырьох підписаных і понумеруваных Варгольом ґрафік. Кінцьом того місяця мал іх выставити на продаж на торгах штукы в Амстердамі.