Владыка Йона стрітив ся з пріматором і посланцями міста Пряшів

Як інформовав Михал Павлишиновіч, говорця Пряшівской ґрекокатолицькой архієпархії, в понедільок 15-го апріля 2024-го року Высокопреосвященый Йона, пряшівскый архієпіскоп і митрополіта, прияв на Ґрекокатолицькім архієпіскопскім уряді пряшівского пріматора Франтішка Ольгу і посланців міста Пряшів, котры прияли його запрошіня.

Гості кір Йоны посмотрили собі експозіцію Пряшівской архієпархії, і в архієпіскопскій Каплічці святого Йосифа владыка співом Хрістос воскресе помолив ся за посланців, їх родины і їх посланя.

Перед вечерьов митрополіта вшыткых щіро привітав і подяковав за дотеперішню співпрацу міста Пряшів і Ґрекокатолицькой церькви. Так само высловив надію, же тота співпраца про гражданів буде далше розвивати ся.

„Тым, котрым служыте з матеріалного боку, Церьков помагать духовно. Іде нам властно вєдно о тых самых людей, о їх благо,“ повів кір Йона.

„Жычу вам, жебы ся вам добрі вело у вашім важнім і одповіднім посланю а благословлю вам,“ додав владыка у своїм приговорі.

Пріматор Пряшова Франтішек Ольга в мені вшыткых подяковав за запрошіня і благословліня про їх роботу на благо Пряшівчанів. Так само представив участных посланців і посланкыні владыкови, котрый іщі лем пару місяців є на посаді архіпіскопа і митрополіты в Пряшові.

„Стріча проходила в приємній атмосфері і была з боку владыкы Йоны проявліньом почливости ку представителям Пряшова, а посередництвом них і ку жытелям міста, котрых они заступають,“ закінчів Павлишиновіч.