Владыка Курт Бурнетт на навщіві Мукачовской єпархії

В тых днях навщівив Мукачовску ґрекокатолицьку єпархію Преосвященый владыка Курт Бурнетт, єпарха в Пассаіку, в Споєных штатах Америкы. Владыка пришов на Підкарпатя в часі, коли мала одбыти ся беатіфікація нового священомученика Петра Павла Ороса.

Беатіфікація мала одбыти ся 3-го мая 2025-го року в селі Білкы, што была послідня офіціална парохія нового священомученика перед забороніньом діятельности Мукачовской єпархії з боку комуністічных совітьскых властей.

Правліня Мукачовской єпархії в четверь 24-го апріля інформовало, же дата беатіфікації мусить перенести ся. Тото перенесіня є повязане із смертьов Папы римского Франціска. „Дізнали сьме ся, же деякы з потрібных документів, котры мав підписати Святішый Отець Франціск про завершальне проведжіня беатіфікації, не встиг підписати почас жывота. В повязаню з тым проведжіня торжества беатіфікації на даній етапі стало неможливым,“ інформовала втогды єпархія.

Як на сіті Facebook інформовав сайт Греко-Католицьке Закарпаття, 3-го мая, в день, коли мала быти беатіфікація, владыка Курт вєдно із Преосвященым владыком Теодором Мацапулом, мукачовскым єпархом, одслужыли літурґію в академічнім храмі при Ужгородьскій ґрекокатолицькій богословскій академії.

В тот самый день єпіскопи ішли і до села Білкы, де ся вєдно помолили при мощах священомученика Петра Павла Ороса. „Тот момент быв особенно зворушливым про вшыткых присутных, кедьже якраз тут шанує ся память мужного свідка віры,“ інформовав сайт. По молитві владыкове рушыли до місця першого похованя священомученика в селі Камяньске, жебы „обновити історічну память о переслідованю Ґрекокатолицькой церькви“.

Наконець єпіскопи навщівили Монастырь Пресвятой Родины в Джублику, котрый є выголошеный за місце молитвы Мукачовской єпархії.

В неділю 4-го мая Преосвященый Теодор і Преосвященый Курт одслужыли літурґію в ужгородьскім Крестовоздвиженьскім катедралнім соборі.

Владыка Курт быв призначеный за правлячого єпіскопа Єпархії Пассаік, яка належыть під русиньску Піттсбурзьску митрополію, Папом римскым Франціском у 2013-ім році. Того часу є і апостольскым адміністратором sede vacante Екзархату святых Кіріла і Мефтодія в Торонті, якый так само є підпорядкованый під Піттсбурґ. Екзархат быв до 2022-го року словацьков єпархійов, владыка Курт там быв апостольскым адміністратором уж од року 2020.

Фото: Греко-Католицьке Закарпаття.