Зачала ся 58. Kонвенция ASEEES

12. листопада/новембра в Шікаґо зачала ся 58. шторічна конвенция Association for Slavic, East European, and Eurasian Studies (ASEEES). Тогорічна стріча, котра проходит в днях 12.–15. листопада/новембра, зобрала дослідників, котры занимают ся славяньскыма, східноевропейскыма і євразийскыма темами. Першого дня конференциі зачали ся тіж подii посвячены русиньскій темі. Інавґурацийном стрічом было C-RRC Reception: Celebrating Patricia Krafcik, зорґанізуване з нагоды вшануваня наукового доробку проф. Патрициі Крафчік.

Стріча была посвячена так многолітній науковій діяльности дослідничкы, як і єй книжці Witnesses to Interwar Subcarpathian Rus’: The Sojourns of Petr Bogatyrev and Ivan Olbracht.

Подію зачал др Нік Купеньскій з Академіі Повітряных Сил ЗША, котрый представил проф. Крафчік, припоминаючы єй наукову діяльніст і значыня єй дослідничой працы. Поділил ся тіж особистыма рефлексиями і споминами, повязаныма з дослідничком. Пак голос забрал проф. Павел Роберт Маґочій з Торонтского Університету. В своім выступліню звернул увагу на многолітню працю дослідників, такых як проф. Крафчік, котры посвятили значну част свого жытя популяризациі знаня о Карпаторусинах і іх достоменности в Пілнічній Америці. Підкрислил, же тота праца створила основы для розвитку карпаторусиньскых студий і дала можливости навязуваня контактів та спілпрацы з европейскыма науковцями по 1989 році, спричыняючы дальше зміцнюваня медженародного наукового середовиска і карпаторусиньского руху.

Центральном частю стрічы была презентация проф. Патрициі Крафчік, котра представила свою книжку Witnesses to Interwar Subcarpathian Rus’. Публикация посвячена є двом персонам, котрых діяльніст была важным слідом в документациi і описі меджевоєнной Підкарпатской Руси – Петрови Богатырьовови та Іванови Ольбрахтови. Авторка книжкы приближыла іх досвід, спостережыня і доробок, вказуючы при тым многовымірный образ реґіону в меджевоєнным періоді.

Сеса стріча была першом з посвяченых русиньскій темі в рамках ASEEES. Наступны три панелi заплянуваны сут на пятницю і суботу, 13. і 14. листопада/новембра.