1-го новембра 2020-го року у віці 89 років вмер академічный малярь проф. Іван Нестор Шафранко. Інформація о його смерти пришла лем вчера.
Од дітинства быв у контакті із основателями Підкарпатьской малярьской школы як Йосиф Бокшай і Адалберт Ерделій. Він сам став єдным із найвызначнішых умелців на Словакії.
Іван Нестор Шафранко народив ся в селі Туря Пасіка на Підкарпатьскій Руси 26-го мая 1931-го року. Штудовав на Руській ґімназії в Гуменнім, котру закінчів у 1951-ім році, пак продовжовав штудії на Академії вытварных умень в Празі, яку абсолвовав у 1957-ім році.
По закінчіню штудій вернув ся на выходну Словакію, наперед до Кошыць. Од 1960-го року учів на Універзіті Павла Йозефа Шафарика в Пряшові, здобыв тітулы доцента і професора. В Пряшові жыв аж до смерти.
Як сімпатізант русиньского возродного руху по 1989-ім році брав участь на вшыткых выставках русиньскых вытварных умелців орґанізованых Русиньсков обродов, в тім чіслі і на меджінародній выставці русиньскых малярів у Шарішскій ґалерії в рамках Світового конґресу Русинів у 2003-ім році в Пряшові.
Такой у 1990-ім році быв і співосновательом і першым председом Общества Енді Варгола. У 2004-ім році дістав Премію Енді Варгола за свій вклад до вытварного уменя. Окрім того здобыв многы іншы оцініня.
Веце о творчости Івана Нестора Шафранка і выставці його творів, котра лем недавно проходила у Выходословацькій ґалерії в Кошыцях, можете дочітати ся в нашій статі за тым мотузком.
ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫК
Коментарі