Як інформовала родина, дня 31-го октобра 2020-го року добило сердце русиньской малярькы Зузаны Осавчуковой Гапаковой. Вмерла у віці 86 років.
Доц. ПгДр. Зузана Осавчукова, к. н., з дому Гапакова, народила ся 18-го септембра 1934-го року в Пінківцях, в окресі Собранці.
Скінчіла Руську ґімназію в Гуменнім, пак абсолвовала комбінацію вытварна выхова і російскый язык на Высокій школі педаґоґічній в Братіславі. Зо зачатку учіла на Середній педаґоґічній школі в Пряшові, пізніше на Катедрі вытварной выховы Педаґоґічной факулты Універзіты Павла Йозефа Шафарика в Пряшові, одкыль у 1991-ім році одышла до пензії. В тім самім році была прията до Словацькой вытварной унії.
Єден час, іщі перед 1989-ым роком, коли Русины не мали властну пресу, робила і в редакції україньского журналу Дружно вперед. Зузана Осавчукова Гапакова написала учебникы мальованя про першы і другы річникы учітельского нампряму і дакілько далшых высокошкольскых учебників про штудентів педаґоґікы о естетіці і мальованю. У 2014-ім році выдала моноґрафію о своїм братови Штефанови Гапакови, котрый быв так само вызначным русиньскым малярьом.
В творчости малярькы доміновав пейзаж, пастел і олійовы фарбы, творила закутины ці букеты квітів. Із їй творів мож спомянути наприклад На дворі в Дрєніці, Послідні хрізантемы, Спішскый сужет, Розквітнута яблінь, Пусте Поле ці Іновецькый хотарь. Робила і портреты. Мала много выставок, по выникнутю Словацького народного музея – Музея русиньской културы в Пряшові выставльовала і там.
Ґрекокатолицькы похоронны обряды Зузаны Осавчуковой Гапаковой одбудуть ся в четверь 5-го новембра о 12.00 год. на цінтері в Нерешах.
Жрідло фотоґрафії: rusynacademy.sk.
ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА
Коментарі