Во Вроцлаві од 12.00 год. в днешню неділю, 15. вересня/септембра, проходит Фестіваль «Наша спільна Незалежна», орґанізуваный нижньошлезскым воєводом Павлом Греняком. В подіі берут участ м.ін. меншыны, жыючы в Польщы. Свій крам мают і Русины. Подія одбыват ся при Бульварі ім. Леха і Мариі Качыньскых, над берегом рікы Одры.
Посеред вельох атракций, котры орґанізатор предвиділ в проґрамі (деталі чытайте долов), сут експозициі поєдных меншын в іх выділеных просторах, концерты, кухня, варштаты танця, конкурсы і інчы. Лемківску етнічну меншыну представлят Стоваришыня Руска Бурса враз з радийом ЛЕМ.фм. В лемківскым просторі фестівалю своі писанкы експонує Мария Кєлечава.
Меншыны во Вроцлаві
Попри нашым крамі – направо од сцены – находят ся тіж другы етнічны меншыны (в польскым законі о меншынах так называны сут бездержавны народы) – Татары і Караімы. Для любителів східньславяньской кухні деґустацию веде стоваришыня Порозумліня Схід-Захід. По лівій стороні од сцены своє місце нашли дальшы меншыны : хорватска, німецка, індийска, ізраільска, украіньска, американьска, фінляндска і мадярска.
Коментарі